අත්තනගලු ඔයේ දූනමලේ ජල මාපාන්කය පිහිටි ස්ථානය අසල දී සෙල්ෆි ඡායාරූපයක් ගැනීමට ගිය තරුණියක් පය ලිස්සා ගොස් ඔයට වැටී අතුරුදන්ව තිබෙනවා.
නිට්ටඹුව පොලිසිය පැවසුවේ කෙසෙල් වත්ත, ගුණසිංහපුර ප්රදේශයේ පදිංචිව සිටි 21 හැවිරිදි තරුණියක් ඊයේ (02) පස්වරුවේ මෙලෙස අතුරුදන්ව ඇති බවයි.
අතුරුදන්ව ඇති තරුණියගේ යෙහෙළියන් දෙදෙනෙකු ඔවුන්ගේ තිහාරිය ප්රදේශයේ පදිංචි ඥාති නිවෙසකට පැමිණ ඇති අතර, මෙම තරුණිය ද ඔවුන් සමඟ එහි පැමිණ තිබෙනවා.
එහිදී තිදෙනාම අත්තනගලු ඔය අසලට පැමිණ ඇති අතර, එහිදී සෙල්ෆි ඡායාරූපයක් ගැනීමට ගිය අවස්ථාවේ මෙම තරුණිය පය ලිස්සා අත්තනගලු ඔයට වැටී ඇති බවයි වාර්තා වන්නේ.
අතුරුදන් වූ තරුණිය සොයා නාවික කිමිඳුම් අංශය මේ වනවිටත් මෙහෙයුම් ආරම්භ කර ඇති බවයි අප වාර්තාකරු සඳහන් කළේ.
