නැගෙනහිර වෙරළ තීරයේ ගොඩබිමට ආසන්න මුහුදු ජල තීරයට ‘මුහුදු කුකුළා’ නමැති මත්ස්‍ය විශේෂය මියගොස් පාවෙන බවට වාර්තා වනවා.
දසත ප්‍රාදේශීය වාර්තාකරු පැවසුවේ; මීට හේතුව වී ඇත්තේ මේ වනවිට (01) නැගෙනහිර මුහුදු කලාපයට ද වාරකම් කාලය සක්‍රීය වී තිබීමෙන් ගැඹුරු මුහුදේ සිටින මෙම මත්ස්‍ය විශේෂය මුහුදු රළත් සමග නොගැඹුරු මුහුදට සහ කළපු තීරය වෙත ගසාගෙන පැමිණ ඇති බවයි.
මෙම මත්ස්‍ය විශේෂයට ජීවත් වීමට ගැඹුරු මුහුදේ අධි පීඩනයක් අවශ්‍ය බවත් නොගැඹුරු මුහුදු කලාපයට පැමිණීමෙන් පසු ලැබෙන අඩු පීඩන තත්ත්වය ඔවුන්ට ඔරොත්තු නොදෙන බව මෙකී මත්ස්‍යයින් මෙලෙස මියයාමට හේතුව බව පැවසෙනවා.
මේ හේතුවෙන් මියගිය මුහුදු කුකුළා නමැති මත්ස්‍ය විශේෂය මේ වනවිට ද ත්‍රිකුණාමලය කොඩ් බේ ධීවර වරාය ආශ්‍රිත ප්‍රදේශයේ සහ චීන වරාය භූමියේ පාවෙමින් තිබීම හේතුවෙන් එම ප්‍රදේශයේ දැඩි දුර්ගන්ධයක් හමා යමින් තිබීම දෛනික ජීවන කටයුතුවලට දැඩි බලපෑම් ගෙනැවිත් තිබෙනවා.
wpDiscuz
