හෝමූස් සමුද්ර සන්ධියේ නාවික අවහිරතාවයන් හේතුවෙන් ශ්රී ලංකාව ඔස්සේ නව භාණ්ඩ ප්රවාහන මාර්ගයක් විවර වී තිබෙනවා.
ඒ අනුව ඉතාලියේ නිෂ්පාදිත නවීනතම ලැම්බෝගිනි මෝටර් රථ 14 ක්, ශ්රී ලංකාව හරහා ඩුබායි සහ කටාර් රාජ්යයට රැගෙන යාමට නියමිතයි.
ඉතාලියේ සිට මුහුදු මාර්ගය ඔස්සේ හම්බන්තොට වරාය වෙත ගෙනැවිත්, එතැන් සිට අඩි 40 ක් දිග බහාලුම් 07 ක බහා කටුනායක ගුවන් තොටුපොළ වෙත ගෙනවිත් තිබුණා.
ඉන් අනතුරව එම මෝටර් රථ විශාලත භාණ්ඩ ප්රවාහන ගුවන් යානයක පටවා, කටුනායක ගුවන් තොටුපොළේ සිට ඩුබායි සහ කටාර් රාජ්යයේ දෝහා වෙත රැගෙන යාමට පියවර ගෙන තිබෙනවා.
මෙම එක් මෝටර් රථයක අවම මිල ශ්රි ලංකා රුපියල් කෝටි 50 ක් වන අතර එහි ස්පෝට්ස් කාණ්ඩයේ රථයක මිල රුපියල් කෝටි 100ක් පමණ වන බවත්, ඒ අනුව නව භාණ්ඩ ප්රවාහන මාර්ගය නිසා ශ්රී ලංකාවට ද ආර්ථික වශයෙන් වාසිදායක තත්වයක් උදා වෙමින් පවතින බවත් , මෙම මෝටර් රථ ප්රවාහනය සදහා භාර ගෙන ඇති ඩෙන්මාර්කයට අයත් සමාගමක් පෙන්වා දෙනවා.
මෙම මෝටර් රථ මීට දින කීපයකට පෙර හම්බන්තොට වරායට ගෙනැවිත් තිබූ අතර අද (21) දිනයේ දි මෙම මෝටර් රථ තොගය රැගත් ගුවන් යානය ඩුබායි සහ දෝහා බලා කටුනායක ගුවන් තොටුපොළෙන් පිටත්ව යාමට නියමිතයි.
