ඇතැම් උද්ඝෝෂණවල යෙදීසිටි පුද්ගලයින් විසින් ගිනි තැබීම්, අයුතු ඇතුළුවීම්, අනර්ථය සිදුකිරීම් වැනි ක්‍රියා සිදුකළ බවට වාර්තා වී ඇති බව පොලීසිය පවසයි.
එවැනි ක්‍රියා සිදුකළ පුද්ගලයින් අත්අඩංගුවට ගෙන ඇති අතර වීඩියෝ සාක්ෂි මත හඳුනාගෙන ඇති තවත් පුද්ගලයින් ඉදිරියේදී අත්අඩංගුවට ගැනීමට නියමිත බව පොලිස් මාධ්‍ය ප්‍රකාශක කාර්යාලය නිවේදනය කරයි.
ඕනෑම අයෙකුට සාමකාමී උද්ඝෝෂණයක් සිදුකිරීමට හැකියාවක් තිබුණ ද කලහකාරී සහ ප්‍රචණ්ඩකාරී ක්‍රියාවල යෙදෙමින් උද්ඝෝෂණ සිදුකරන්නන් අත්අඩංගුවට ගන්නා බව පොලීසිය පවසයි.
එබැවින් කලහකාරී සහ ප්‍රචණ්ඩකාරී ක්‍රියාවල නොයෙදෙන ලෙස සියලුදෙනාගෙන් ඉල්ලා සිටින බව නිවේදනයක් නිකුත් කරමින් පොලිස් මාධ්‍ය ප්‍රකාශක කාර්යාලය සඳහන් කළේය.
මේ අතර උද්ඝෝෂණයක් අතරතුර කාකි ඇඳුමකින් සැරසුණු පුද්ගලයෙකු කළු පැහැති ජැකැට්ටුවක් සහ සුදු පැහැති ආරක්ෂිත හිස් වැසුමක් පැළඳ මෙගා ෆෝන් යන්ත්‍රයක් ආධාරයෙන් රැස්ව සිටි පිරිස අමතා “යුනිෆෝම් ඇඳන් හිටියත් අපිත් ඔයාලත් එක්ක තමයි” යනුවෙන් ප්‍රකාශයක් සිදුකරන වීඩියෝ පටයක් සමාජ මාධ්‍ය ජාලාවල ප්‍රචාරය වෙමින් පවතින බව පොලීසිය පවසයි.
එම වීඩියෝ පටයේ කාකි ඇඳුමින් සැරසී සිටින පුද්ගලයා පොලිස් නිලධාරියෙකු හෝ වෙනත් පුද්ගලයෙකු ද යන්න අනාවරණය කර ගැනීම සඳහා විමර්ශනයක් ආරම්භ කර ඇති බව පොලීසිය ප්‍රකාශ කළේය.
