ශ්‍රී ලංකාව සහ සංචාරක ඕස්ට්‍රේලියාව අතර තරග පහකින් සමන්විත එක්දින තරගාවලිය අද (14) මහනුවර, පල්ලේකැලේ ජාත්‍යන්තර ක්‍රිකට් ක්‍රීඩාංගනයේ දී ආරම්භ වනවා.
නිමා වූ විස්සයි විස්ස තරගාවලි ජයග්‍රහණය සහ අවසන් විස්සයි විස්ස තරගයේ ජයග්‍රහණයත් සමඟ කණ්ඩායම් දෙකම ජයග්‍රාහී මානසිකත්වයෙන් අද දිනයේ එක්දින තරගාවලියට පිවිසෙනවා.
අද තරගය සඳහා එක්වන ඕස්ට්‍රේලියානු කණ්ඩායම ඊයේ දිනයේ ප්‍රකාශයට පත්කළ ද ශ්‍රී ලංකා කණ්ඩායම තවමන්ත් නිල වශයෙන් ප්‍රකාශයට පත්කර නැහැ.
මේ දක්වා දෙරට අතර එක්දින තරග 97ක් පවත්වා ඇති අතර ඉන් තරග 61ක් ජය ගැනීමට ඕස්ට්‍රේලියාව සමත්ව සිටින අතර, ශ්‍රී ලංකාවට ලැබී ඇති ජයග්‍රහණ සංඛ්‍යාව 32ක්.
ජය පැරදුමෙන් තොරව අවසන් වූ තරග සංඛ්‍යාව 04ක් බවයි පසුගිය වාර්තාවල දැක්වෙන්නේ.
එක්දින තරගයක දී අවසන් වරට ශ්‍රී ලංකාව සහ ඕස්ට්‍රේලියාව හමුව ඇත්තේ 2019 වසරේ ජූනි 15 වනදායි.
ඒ අනුව අද දිනයේ දී ශ්‍රී ලංකාව සහ ඕස්ට්‍රේලියාව එක්දින තරගයක් සඳහා එකිනෙකා මුණ ගැසෙන්නේ වසර 03කට පසුව වීම විශේෂත්වයක්.
2022 වර්ෂය සඳහා මේ දක්වා ඕස්ට්‍රේලියාව එක්දින තරග 03ක් පමණක් ක්‍රීඩා කර ඇති අතර ඉන් තරග 02ක් පරාජයට පත්ව තිබෙනවා.
ශ්‍රී ලංකාව ද මෙම වසර සඳහා එක්දින තරග 03ක් ක්‍රීඩා කර ඇති අතර එහි ප්‍රතිඵලය ලෙස දැක්වෙන්නේ ජයග්‍රහණ 02ක් සහ එක් පරාජයක් ලෙසටයි.
දෙරට අතර අද (14) ආරම්භවන පළමු තරගය මෙරට වේලාවෙන් පස්වරු 2.30ට ආරම්භ වීමට නියමිතව තිබෙනවා.
