ඇමරිකා එක්සත් ජනපදයේ නිව්යෝර්ක් නුවර මැන්හැටන්හි චයිනාටවුන් ප්රදේශයේ රහසිගත චීන පොලිස් ස්ථානයක් පවත්වාගෙන යාමට සහාය වීම සම්බන්ධයෙන් ලු ජියැන්වැන්ග් නැමැති 64 හැවිරිදි ඇමරිකානු පුරවැසියෙකු වරදකරු බවට ඇමරිකානු අධිකරණ ජූරි සභාවක් විසින් තීරණය කර තිබෙනවා.
චීන රජයේ මහජන ආරක්ෂක අමාත්යාංශය (MPS) වෙනුවෙන් 2022 වසරේ මුල් භාගයේදී මෙම රහසිගත කාර්යාලය විවෘත කර ක්රියාත්මක කළ බවට ඔහුට චෝදනා එල්ල වුණා.
ඔහුට එරෙහිව චීන රජයේ නීතිවිරෝධී නියෝජිතයෙකු ලෙස කටයුතු කිරීම සහ පරීක්ෂණවලට අදාළ සාක්ෂි විනාශ කරමින් යුක්තිය පසිඳලීමට බාධා කිරීම (Obstruction of justice) යන චෝදනා ඔප්පු වී තිබෙනවා.
මෙම වරදවල් සඳහා ලු ජියැන්වැන්ග්ට වසර 30ක් දක්වා සිරදඬුවම් නියම විය හැකි බව නීති අංශ පවසනවා.
මෙහි අනෙක් විත්තිකරු වූ චෙන් ජින්පින්ග් නමැත්තා 2024 දෙසැම්බර් මාසයේදීම සිය වැරදි පිළිගත්තා.
ඔහුට දඬුවම් නියම කිරීම ද ඉදිරියේදී සිදුවීමට නියමිතයි .
එෆ්.බී.අයි (FBI) ආයතනය පවසන පරිදි, චීන රජයේ දේශපාලන න්යාය පත්රයන් ඉදිරියට පවත්වාගෙන යාම සඳහා සහ චීන විරුද්ධවාදීන් ඉලක්ක කර කටයුතු කිරීමට මෙම රහස් පොලිස් ස්ථානය භාවිත කර තිබෙනවා.
මානව හිමිකම් සංවිධාන පෙන්වා දෙන්නේ විදේශගතව සිටින චීන පුරවැසියන් සහ ප්රජාතන්ත්රවාදී ක්රියාකාරීන් නිරීක්ෂණය කිරීමට හා ඔවුන්ට තර්ජනය කිරීමට බෙයිජිං පාලනය විසින් ලොව පුරා රටවල් 53ක මෙවැනි රහස් මධ්යස්ථාන 100කට වඩා පිහිටුවා ඇති බවයි.
කෙසේ වෙතත්, චීනය මෙම චෝදනා ප්රතික්ෂේප කරන අතර, ඔවුන් පවසන්නේ මේවා රියදුරු බලපත්ර අලුත් කිරීම සහ වසංගත ආධාර වැනි පරිපාලන සේවා සපයන “සේවා මධ්යස්ථාන” පමණක් බවයි.
