මේ මස 03,04 සහ 05 යන ඉදිරි දින තුන තුළ දී මහර බන්ධනාගාරයේ රඳවා සිටින රැඳවියන් හට අමුත්තන් පෙන්වීම සිදු නොකරන බව මහර බන්ධනාගාර අධිකාරීවරයා දැනුම් දෙනවා.
ඊයේ (01) එම බන්ධනාගාරය තුළ ඇති වූ කලහාකාරී තත්ත්වයත් හේතුවෙන් දේපලවලට හානි සිදුවීම නිසා ඉදිරි දින තුන තුළ දී රැඳවියන් හමුවීමට අමුත්තන්ට අවස්ථාව ලබා නොදෙන බවයි බන්ධනාගාර අධිකාරීවරයා සඳහන් කරන්නේ.
මේ අතර මහර බන්ධනාගරයේ සිට වෙනත් බන්ධනාගාර වෙත මාරුකර යැවූ රැඳවියන්ගේ නාම ලේඛනයක් බන්ධනාගරයෙන් පිටත ප්‍රදර්ශනය කර තිබෙනවා.
ඒ අනුව රැඳවියන් 104 දෙනෙකු බන්ධනාගාර 07ක් වෙත මාරු කර යවා තිබෙනවා.
එමෙන්ම ඇති වූ කලහාකාරී තත්ත්වය හේතුවෙන් තුවාල ලබා රෝහල් ගතකර සිටින රැඳවියන්ගේ නාම ලේඛනයක් ද ප්‍රදර්ශනය කර ඇති බවයි අප වාර්තාකරු සඳහන් කළේ.
ඒ, අනුව මෙම සිද්ධියෙන් තුවාල ලබා රෝහල් ගතකළ රැඳවියන්ගේ සංඛ්‍යාව 10ක් දක්වා ඉහළ ගොස් ඇති අතර, එක් රැඳවියෙක් ජීවිතක්ෂයට පත්ව තිබෙනවා.
