එක්සත් ජාතීන්ගේ මහා මණ්ඩලයේ 78 වැනි සැසිවාරයේ දී සාමාජික රටවල් 193ම එක්ව උප සභාපතිවරයකු ලෙස ශ්‍රී ලංකාව ඒකමතිකව තෝරා පත් කරගෙන තිබෙනවා.
එක්සත් ජාතීන්ගේ සංවිධානයේ නිත්‍ය නියෝජිත තානාපති මොහාන් පීරිස් මහතා නියෝජනය කරමින් ශ්‍රී ලංකාව ආසියා පැසිෆික් කලාපය වෙනුවෙන් මෙම වසරේ සැප්තැම්බර් මාසයේ සිට 2024 වසරේ සැප්තැම්බර් මාසය දක්වා මෙම තීරණාත්මක තනතුර භාරගනු ඇති.
බොලිවියාව, කොංගෝව, එස්තෝනියාව, ගැම්බියාව, අයිස්ලන්තය, ඉරානය, මැලේසියාව, නෙදර්ලන්තය, සෙනගාලය, සිංගප්පූරුව, මොරොක්කෝව, සුරිනාම්, උගන්ඩාව, උස්බෙකිස්තානය සහ සැම්බියාව ඇතුළු රටවල් රැසක් අතරින් ශ්‍රී ලංකාව උප සභාපති ධුරයට පත් කරන බවටයි එක්සත් ජාතීන්ගේ සංවිධානය නිවේදනය කළේ.
අලුතින් තේරී පත් වූ මෙම උප සභාපතිවරු චීනය, ප්‍රංශය, රුසියානු සමූහාණ්ඩුව, එක්සත් රාජධානිය සහ එක්සත් ජනපදය යන ආරක්ෂක මණ්ඩලයේ ස්ථිර සාමාජිකයන් පස්දෙනා සමඟ එක්වනු ඇති.
