2023/25 ලෝක ටෙස්ට් ශූරතා තරගාවලියේ අවසන් මහා තරගය අද (11) පස්වරු 03ට ලෝඩ්ස් ක්‍රීඩාංගණයේ දී ආරම්භ වනවා.
ඒ වත්මන් ටෙස්ට් ශූර ඔස්ට්‍රෙලියාවට එරෙහිව දකුණු අප්‍රිකානු කණ්ඩායම අතරයි.
ඔස්ට්‍රෙලියානු කණ්ඩායම අවස්ථා දෙකක දී ලෝක ටෙස්ට් ශූරතා අවසන් මහා තරගයට සුදුසුකම් ලබා ඇති අතර ඔවුන් සුදුසුකම් ලැබූ පළමු අවස්ථාවේදීම ලෝක ටෙස්ට් ශූරතාව තමන් සතු කරගන්නට සමත් වුණා.
ඒ 2021/23 වර්ෂයේ දී ප්‍රබල ඉන්දීය කණ්ඩායම පරාජයට පත් කරමින්.
දෙවැනි වරටත් අද දිනයේ දී ඔස්ට්‍රෙලියාව සිය ටෙස්ට් බල ආධිපත්‍යය පතුරුවාලීම අරමුණු කරගනිමින්; පළමු වරට ටෙස්ට් ශූරතා අවසන් මහා තරගයකට සුදුසුකම් ලැබූ දකුණු අප්‍රිකානු කණ්ඩායම සමග තරග වදිනු ඇති.
ලෝක ටෙස්ට් ශූරතා අවසන් මහා සටනට සුදුසුකම් ලබා ගැනීමේ දී දකුණු අප්‍රිකාව තමන්ට හිමි වූ තරග 12න් තරග 08ක් දිනා 03ක් පමණක් පරාජයට පත් වී එක් තරගයක් ජය පරාජයෙන් තොරව අවසන් කරගත්තා.
ඒ 69.44% ක ප්‍රතිශතාත්මක වර්ධනීය තත්ත්වයක් ද සමගින්.
ඔස්ට්‍රෙලියානු කණ්ඩායම තරග 19කින් 13ක් ම ජයගෙන දෙකක් ජය පරාජයෙන් තොරව අවසන් කරගැනීමට සමත් වුණා.
ඒ සිය තරග ජය ගැනීමේ දක්ෂතාව සියයට 67.54ක් රඳවා ගනිමින්.
කෙසේවෙතත් මෙවන් තත්ත්වයක දී අද පැට් කමින්ස්ගේ සහ ටෙම්බා බවුමාගේ නායකත්වයෙන් යුතුව ඔස්ට්‍රෙලියාව සහ දකුණු අප්‍රිකානු කණ්ඩායම අවසන් මහා ටෙස්ට් තරගයේ දී සම්මුඛ වනු ඇති.
