පාකිස්තාන හිටපු වේග පන්දු යවන ක්‍රීඩක මොහොමඩ් අමීර් ලබන වසරේ බ්‍රිතාන්‍ය විදේශ ගමන් බලපත්‍රය ලබා ගැනීමට සූදානමින් සිටින බව වාර්තා වනවා.
මෙම සුපිරි වේග පන්දු යවන්නා 2016 වසරේ දී බ්‍රිතාන්‍ය පුරවැසිභාවය හිමි නීතිඥවරියකු වන නර්ජිස් ඛාන් සමඟ විවාහ වුණා.
ඉන් අනතුරුව අමීර් 2020 වසරේ දී එංගලන්තයට සංක්‍රමණය වූ අතර,ඒ අනුවයි ඔහුට බ්‍රිතාන්‍ය විදේශ ගමන් බලපත්‍රය හිමිවිමට ඇත්තේ.
මේ සමඟ මාධ්‍ය ඔහුගෙන් විමසා ඇත්තේ මුදල්වලින් පොහොසත් ඉන්දීය ප්‍රිමියර් ලීග් තරගාවලියට සම්බන්ධවීමට කැමැත්තෙන් සිටී ද යන්නයි.
එම පැනයට පිළිතුරු දෙමින්, “මට එක අවුරුද්දයි තියෙන්නේ. මොකද වෙන්නේ කියලා මම දන්නේ නැහැ. මම හැම වෙලේම පියවරෙන් පියවර යනවා. අවුරුද්දකට පස්සේ මම කොහේ ඉන්නවද කියලා මම දන්නේ නැහැ. කවුරුවත් අනාගතය දන්නේ නැහැ. මට විදේශ ගමන් බලපත්‍රය ලැබුණාම මම මට ලැබෙන හොඳම අවස්ථාව අනිවාර්යයෙන්ම ලබාගන්නවා.” යනුවෙන් මොහොමඩ් අමීර් පවසා සිටියා.
කෙසේ වෙතත් ඉන්දීය ප්‍රිමියර් ලීගයට සහභාගී වීමට පකිස්ථාන ක්‍රීඩකයින්ට අවසර නොමැති අතර,කෙසේ වෙතත්, බ්‍රිතාන්‍ය විදේශ ගමන් බලපත්‍රයත් සමඟ බොහෝ විට අමීර්ට එම අවස්ථාව හිමිවනු ඇති බවයි විශ්වාස කරන්නේ.
2008 වසරේ සමාරම්භක වාරයේ දී පාකිස්ථාන ක්‍රීඩකයින් අයි.පී.එල්.තරඟාවලියේ කොටසක් වූ නමුත්, දෙරට අතර දේශපාලන සබඳතා පිරිහීම හේතුවෙන් පාකිස්ථාන ක්‍රීඩකයින්ට අයි.පී.එල්.තරඟාවලියේ දොරටු වසා දැමුවා.
wpDiscuz
