නොරොච්චෝල ප්‍රදේශයේදී මත් කරල් 423,000ක් සමග සැකකරුවෙකු අත්අඩංගුවට ගෙන තිබෙනවා.
පොලිස් සහ නාවික හමුදා ඒකාබද්ධ මාර්ග බාධකයේදීයි අද අලුයම මෙම වැටලීම සිදුකර ඇත්තේ.
නොරොච්චෝල පොලිසියට ලැබුණු තොරතුරකට අනුව මාර්ග බාධකයේදී කල්පිටිය සිට පාලවිය දෙසට ගමන් ගත් වෑන් රථයක් පරීක්ෂා කිරීමේදී මෙම මත් කරල් තොගය හමුවී තිබෙනවා.
මෙම මත් කරල් තොගය නීති විරෝධී ලෙස ඉන්දියාවෙන් මුහුදු මාර්ගයෙන් රැගෙන විත් අලේවි කිරීම සඳහා රැගෙන යමින් තිබී ඇතැයි සඳහන්.
ඒවායෙහි වටිනාකම රුපියල් ලක්ෂ 500 කට අධික බවටයි හෙළිවී ඇත්තේ.
මෙම අධි වේදනා නාශක කරල් පාසල් සිසුන් සහ තරුණයින් ඉලක්ක කරමින් අලෙවි කරන බව පොලිස් පරීක්ෂණවලදී අනාවරණ වී තිබෙනවා.
සැකකරු රාජගිරිය ප්‍රදේශයේ පදිංචි 29 හැවිරිදි අයෙක්. ඔහු අද පුත්තලම මහේස්ත්‍රාත් හමුවට ඉදිරිපත් කිරීමට නියමිත අතර නොරොච්චෝල පොලිසියයි විමර්ශණ සිදු කරන්නේ.
මේ අතර නීති විරෝධී ලෙස මෙරටට ගෙන්වන ලද විදේශීය දුම්වැටි 800ක් සමග විදේශිකයෙකු අත්අඩංගුවට ගෙන තිබෙනවා.
ඊයේ සවස මෙම වැටලීම සිදු කරනු ලැබුවේ කොල්ලුපිටිය පොලිසියට ලැබුණු තොරතුරකට අනුවයි.
32 හැවිරිදි සැකකරු චීන ජාතිකයෙක්. ඔහු අද අලුත්කඩේ මහේස්ත්‍රාත් අධිකරණයට ඉදිරිපත් කිරීමට නියමිතයි.
