2025 ශූරයින්ගේ කුසලානය වෙනුවෙන් ඉන්දීය ක්‍රිකට් කණ්ඩායම පාකිස්තානයේ සංචාරය කිරීම අවිනිශ්චිත තත්ත්වයක පවතිනවා.
මෙම තරගාවලියේ සියලුම තරග පාකිස්තාන තුළ පැවැත්වෙන අතර, ඉන්දියාව සහ පාකිස්තානය අතර පවතින දේශපාලනික අර්බුද සහ ගැටුම් හේතුවෙනුයි ඉන්දීය කණ්ඩායම මෙම තරගාවලියට එක්වීම අවිනිශ්චිත වී ඇත්තේ.
මේ අතර ඉන්දීය ක්‍රිකට් පාලක මණ්ඩලය (BCCI) ජාත්‍යන්තර ක්‍රිකට් කවුන්සිලයෙන් (ICC) තරඟාවලිය පාකිස්තානයෙන් පිටතට ගෙන යාමට හෝ ඉන්දියාවේ තරග මධ්‍යස්ථ ස්ථානයක පවත්වන ලෙස ඉල්ලා තිබෙනවා.
කෙසේ නමුත් එම ඉල්ලීම් සම්බන්ධයෙන් තවමත් තීරණයක් ලබා දී නැහැ.
ඉන්දියාව මෙම තරගාවලියට නොයන බවට මෑතක දී ඇතැම් මාධ්‍ය වාර්තා පළ වූ අතර, එම වාර්තාවලට පිළිතුරු ලබා දෙමින් ඉන්දීය ක්‍රිකට් පාලක මණ්ඩලයේ උප සභාපති රජීව් ශුක්ලා එම වාර්තා ප්‍රතික්ෂේප කර තිබෙනවා.
“එවැනි තොරතුරු ලබා දුන්නේ කුමන මූලාශ්‍රයක්දැයි අපි දන්නේ නැහැ. BCCI මේ සම්බන්ධයෙන් කිසිදු නිල තොරතුරක් නිකුත් කරලත් නෑ.” යනුවෙන් උප සභාපතිවරයා වැඩිදුරටත් සඳහන් කරනවා.
2008 ආසියානු කුසලානයෙන් පසු ඉන්දීය කණ්ඩායම පාකිස්තානයට ගොස් නොමැති අතර, පසුගිය වසරේ ආසියානු කුසලාන තරඟාවලියේ සත්කාරකත්වය පාකිස්තානයට හිමි වූ නමුත් ඉන්දීය කණ්ඩායමේ තරග ශ්‍රී ලංකාවේ පැවැත්වීමටයි කටයුතු කළේ.
මේ අතර ඉන්දීය කණ්ඩායම චැම්පියන්ස් කුසලානයෙන් ඉවත් වුවහොත්, 2023 එක්දින ලෝක කුසලාන ශ්‍රේණිගත කිරීම්වල 09 වැනි ස්ථානයට පත් ශ්‍රී ලංකාවට මෙම තරගාවලියට සහභාගීවීමට අවස්ථාව හිමි වනවා.
