එක්දින ලෝක කුසලාන ක්‍රිකට් තරඟාවලියට සුදුසුකම් ලබාගැනීමේ තරඟ වටයේ බටහිර ඉන්දිය කොදෙව් කණ්ඩායම සහ ශ්‍රී ලංකා කණ්ඩායම අතර තරගය අද (07) පැවැත්වෙනවා.
සිම්බාබ්වේ හරාරේ හිදී අද දහවල් 12.30ට මෙම තරගය ආරම්භවීමට නියමිතයි.
මෙම තරගාවලියේ ශ්‍රී ලංකාව මේ දක්වා සහභාගී වූ තරග සියල්ලම ජයගෙන 2023 ලෝක කුසලාන තරගාවලියට සුදුසුකම් ලබා සිටිනවා.
ඒ, අනුව අද තරගයේ දී ශ්‍රී ලංකා පිළේ වෙනස්කම් කිහිපයක් සිදුවනු ඇති බවයි සිම්බාබ්වෙන් වාර්තා වන්නේ.
මේ අතර 2023 ලෝක කුසලාන තරගාවලියට සුදුසුකම් ලබාගැනීමට නොහැකි වූ කොදෙව්වන් මෙම තරගාවලියේ සහභාගී වන අවසන් තරගය ද මෙය වනවා.
ඒ, අනුව තරගාවලිය ජයග්‍රහණයකින් අවසන් කිරීමට නම් අද තරගය කොදෙව්වන් ජයගත යුතු අතර, මේ වනවිටත් ඔවුන්ගේ කණ්ඩායමේ වෙනස්කම් කිහිපයක් සිදුව තිබෙනවා.
කණ්ඩායමේ ප්‍රබල ක්‍රීඩකයින් දෙදෙනෙකු වන තුන්ඉරියව් ක්‍රිඩක ජේසන් හෝල්ඩර් සහ වේගපන්දු යවන ක්‍රීඩක අල්සාරි ජෝශප් යළි කොදෙව් දේශයට කැඳවනු ලැබුවා.
ඒ, අනුව ඔවුන්ගේ සංචිතයේ මේ වනවිටත් රැඳී සිටින්නේ ක්‍රීඩකයින් 13 දෙනෙකු පමණක් වන අතර, හෝල්ඩර් සහ ජෝශප්ගේ ඉවත්ව යාමෙන් පසු හිස් වූ ස්ථාන දෙක සඳහා ආදේශක ක්‍රීඩකයින් නම් කිරීමට කොදෙව් ක්‍රිකට් බලධාරීන් අද වනතෙක් කටයුතු කර තිබුණේ නැහැ.
