රාජ්ය සේවයේ නියුතු විශේෂඥ වෛද්යවරුන්ගේ සේවා කාලය වයස අවුරුදු 63 දක්වා දීර්ඝ කිරීමට අදාළ චක්රලේඛය මෝසමක් මාර්ගයෙන් අධිකරණය හමුවේ ගොනු කරන බව නීතිපතිවරයා අද අභියාචනාධිකරණයට දැනුම් දී තිබෙනවා.
විශේෂඥ වෛද්යවරුන් වයස අවුරුදු 60 දී අනිවාර්ය විශ්රාම ගැන්වීමට අමාත්ය මණ්ඩලය විසින් ගනු ලැබූ තීරණය බල රහිත කිරීමේ නියෝගයක් නිකුත් කරන ලෙස ඉල්ලා විශේෂඥ වෛද්යවරු 176 දෙනෙකු විසින් ගොනු කළ පෙත්සම අද කැඳවූ අවස්ථාවේදීයි මෙම දැනුම් දීම සිදු කෙරුණේ.
පෙත්සම අද අභියාචනාධිකරණ සභාපති විනිසුරු නිශ්ශංක බන්දුල කරුණාරත්න සහ එම්.සී.බී.එස්. මොරායස් යන මහත්වරුන්ගෙන් සමන්විත විනිසුරු මඩුල්ල ඉදිරියේ කැඳවනු ලැබුවා.
එහිදී රජයේ නිතිඥවරිය සඳහන් කළේ විශේෂඥ වෛද්යවරුන්ගේ සේවා කාලය වයස අවුරුදු 63 දක්වා දීර්ඝ කිරීමට රජය තීරණය කර ඇති බවත් ඊට අදාළව සෞඛ්ය අමාත්යවරයා විසින් නිකුත් කරන චක්රලේඛයේ අන්තර්ගත කරුණු මෝසමක් මාර්ගයෙන් අධිකරණය හමුවේ ගොනු කිරීමට අපේක්ෂා කරන බවයි.
එම මෝසමක් ගොනු කිරීම සඳහා කල් ලබාදෙන ලෙසද රජයේ නීතිඥවරිය අධිකරණයෙන් ඉල්ලා සිටියා.
ඒ අනුව පෙත්සම නැවත සැප්තැම්බර් මස 25 වනදා කැඳවීමට නියම කළ අධිකරණය එදිනට පෙර අදාළ මෝසම ගොනු කිරීමට පියවර ගන්නා ලෙසත් රජයේ නීතිඥවරියට දැනුම් දුන්නා.
