නීතිපතිවරයා වශයෙන් කටයුතු කරමින් සිටියදී අධිකරණයට අපහාස කළැයි චෝදනා කරමින් වත්මන් අගවිනිසුරු ජයන්ත ජයසූරිය මහතාට එරෙහිව නීතිඥ නාගානන්ද කොඩිතුවක්කු විසින් ගොනුකර තිබූ පෙත්සමක් නිෂ්ප්රභ කිරීමට ශ්රේෂ්ඨාධිකරණය තීන්දු කර තිබෙනවා.
මුර්දු ප්රනාන්දු මහත්මිය ප්රමුඛ පංච පුද්ගල ශ්රේෂ්ඨාධිකරණ විනිසුරු මඩුල්ලක් විසිනුයි අද මෙම තීන්දුව ලබා දුන්නේ.
අදාළ පෙත්සම අසත්ය, පදනම් විරහිත හා නොමග යවන සුළු කරුණු පදනම් කරගෙන ගොනු කර තිබෙන බැවින් එය විභාගයට නොගෙන නිෂ්ප්රභ කරන ලෙස නීතිපතිවරයා විසින් මූලික විරෝධතා මතු කර තිබුණා.
එම මූලික විරෝධතා පිළිගත් ශ්රේෂ්ඨාධිකරණය අදාළ පෙත්සම විභාගයට නොගෙන නිෂ්ප්රභ කිරීමට තීන්දු කළා.
තීන්දුව ප්රකාශයට පත් කරමින් විනිසුරු මඩුල්ල සඳහන් කළේ ශ්රී ලංකාවේ ඉහලම අධිකරණය වන ශ්රේෂ්ඨාධිකරණය හමුවේ මෙවැනි පදනම් විරහිත පෙත්සමක් ගොනු කිරීම තුළින් පෙත්සම්කරු අධිකරණය සතු අධිකාරී බලය, මහජන විශ්වාසය හා ගෞරවය අවතක්සේරුවට ලක් කොට අවමානයට ලක් කර ඇති බවයි.
වත්මන් අගවිනිසුරුවරයා නීතිපතිවරයා වශයෙන් සිටියදී නඩුවක් සම්බන්ධයෙන් ඉදිරිපත් කළ කරුණුවලින් අධිකරණයට අපහාස කළේ යැයි චෝදනා කරමින් නීතිඥ නාගානන්ද කොඩිතුවක්කු විසින් මෙම පෙත්සම ගොනු කර තිබුණා.
