බටහිර ඉන්දීය කොදෙව් එක්දින සහ විස්සයි විස්ස කණ්ඩායම් නව පුහුණුකරු ලෙස පත්කළ ඩැරන් සැමී කොදෙව් සුපිරි ක්‍රීඩකයින් කිහිප දෙනෙක් යළි කණ්ඩායම් සමඟ එක්කර ගැනීමට සාකච්ඡා අරඹා ඇති බවට තොරතුරු වාර්තා වනවා.
ඒ, අනුව ප්‍රහාරාත්මක පිතිකරුවන යුගලයක් වන ෂිම්රොන් හෙට්මයර් සහ එවින් ලුවිස්, තුන් ඉරියව් ක්‍රීඩක ඇන්ඩ්‍රේ රසල් මෙන්ම දඟ පන්දු යවන ක්‍රීඩක සුනිල් නරේන් සමඟ මෙලෙස සාකච්ඡා අරඹා ඇති බවයි වාර්තා වන්නේ.
එවින් ලුවිස් නිමා වූ සී.පී.එල්. තරගාවලියෙන් පසුව ඔහු බටහිර ඉන්දීය කොදෙව් තේරීම් සඳහා ඉදිරිපත්ව නොමැති අතර, රසල් 2021 වසරේ එක්සත් අරාබි එමීර් රාජ්‍යයේ පැවති විස්සයි විස්ස ලෝක කුසලානයෙන් පසු බටහිර ඉන්දීය කොදෙව් කණ්ඩායමට ක්‍රීඩා කර නැහැ.
එමෙන්ම සුනිල් නරේන්ගේ බටහිර ඉන්දීය කොදෙව් කණ්ඩායම අවසන් වරට නියෝජනය කර ඇත්තේ 2019 අගෝස්තු මාසයේදීයි.
ප්‍රහාරත්මක පිත්කරු ෂිම්රොන් හෙට්මයර්ට ද මෑතක සිට කොදෙව් සංචිතයක් සඳහා එක්වීමේ අවස්ථාව හිමිවූයේ නැහැ.
සිය නව තනතුරේ වැඩ භාර ගැනීමෙන් අනතුරුව ඩැරන් සැමී මාධ්‍යට සඳහන් කර සිටියේ තම දිගු කාලීන අරමුණ වී ඇත්තේ බටහිර ඉන්දීය කොදෙව්වන් ශ්‍රේණිගත කිරීම්වල ඉහළ තැනකට ඔසවා තැබීම බවයි.
