පසුගිය සැප්තැම්බර් 30 වනදා ඩුබායි සිට ටෙල් අවිව් බලා පියාසර කළ ෆ්ලයිඩුබායි ගුවන් යානයේ සිදුවූ ආරක්ෂක සිදුවීමකින් පසු, එහි සිටි මගීන් 172 දෙනා සහ කාර්ය මණ්ඩල සාමාජිකයින් සියලු දෙනාම ආරක්ෂිත බව තහවුරු කරමින් ෆ්ලයිඩුබායි සමාගම නිල ප්‍රකාශයක් නිකුත් කර තිබෙනවා.
ෆ්ලයිඩුබායි ගුවන් සමාගමේ ප්‍රධාන විධායක නිලධාරී ගයිත් අල් ගයිත් විසින් නිකුත් කරන ලද මෙම ප්‍රකාශය, ඩුබායි මාධ්‍ය කාර්යාලය හරහා ප්‍රසිද්ධියට පත් කෙරුණා.
ගුවන් යානයේ නියමු කුටිය තුළ සිදුවූ ආරක්ෂක සිදුවීමක් හේතුවෙන් යානය සෞදි අරාබියේ ටබුක් වෙත හරවා යැවීමට පියවර ගත් බව ගයිත් අල් ගයිත් පවසන්නේ.
අදාළ සිදුවීමෙන් පසු ගුවන් යානා නියමුවා වෛද්‍ය අනුමැතිය ලබාගෙන එක්සත් අරාබි එමීර් රාජ්‍යය වෙත නැවත පැමිණ ඇති බවත්, සිදුවීමෙන් බලපෑමට ලක්වූවන්ට ගුවන් සමාගම දිගටම සහාය ලබාදෙන බවත් ඔහු සඳහන් කරනවා.
ගුවන් යානය ආරක්ෂිතව පාලනය කර ගොඩබෑමට කටයුතු කළ නියමුවා සහ කැබින් කාර්ය මණ්ඩලය ද අල් ගයිත් විසින් අගය කළ අතර, එමෙන්ම සිදුවීම අතරතුර කාර්ය මණ්ඩලයට සහාය වූ මගීන්ට ද ඔහු සිය ස්තූතිය පළ කර තිබෙනවා.
යානය වෙනත් ස්ථානයකට හරවා යැවීමෙන් පසු දැක්වූ ප්‍රතිචාරය සහ ලබා දුන් සහාය වෙනුවෙන් සෞදි සහ එක්සත් අරාබි එමීර් රාජ්‍යයේ බලධාරීන්ට ද ෆ්ලයිඩුබායි සමාගම සිය කෘතඥතාව පළ කරනවා.
මේ අතර බලධාරීන්ගේ ඉල්ලීම පරිදි, ටෙල් අවිව් වෙත සිදු කෙරෙන ගුවන් මෙහෙයුම් මීළඟ දැනුම් දීමක් සිදුකරන තුරු තාවකාලිකව අත්හිටුවා ඇති බව ගුවන් සමාගම තහවුරු කළේ.
මෙම සිදුවීම සම්බන්ධයෙන් නිල විමර්ශනයක් ක්‍රියාත්මක වෙමින් පවතින බවත්, අදාළ බලධාරීන්ගේ ප්‍රධානත්වයෙන් සහ ෆ්ලයිඩුබායි හි පූර්ණ සහයෝගය ඇතිව එය සිදු කෙරෙන බවත් ප්‍රධාන විධායක නිලධාරීවරයා පවසන්නේ.
“FZ 1073 ගුවන් යානය තුළ සිදුවූ දේ පිළිබඳව බොහෝ ප්‍රශ්න පවතින බව මම දනිමි. අදාළ බලධාරීන්ගේ ප්‍රධානත්වයෙන් සහ ෆ්ලයිඩුබායි හි පූර්ණ සහයෝගය ඇතිව පූර්ණ නිල විමර්ශනයක් දැනටමත් ක්‍රියාත්මක වෙමින් පවතී. සත්‍ය කරුණු තහවුරු කර ගැනීම සඳහා මෙම ක්‍රියාවලියට ඉඩ ලබා දීම වැදගත්ය,” යනුවෙන් ඔහු පැවසුවා.
විමර්ශනය හරහා සත්‍ය කරුණු තහවුරු කර ගැනීමට ඉඩ දිය යුතු බව පවසමින්, ගුවන් යානයේ නියමු කුටිය තුළ සිදුවූ දේ පිළිබඳ වැඩිදුර තොරතුරු හෙළි කිරීමට ෆ්ලයිඩුබායි සමාගම කටයුතු කර නැහැ.
