බෙංගාල බොක්ක සහ අන්දමින් මුහුදු ආශ්‍රිතව වර්ධනය වී ඉන්දියාවට දෙසට යොමුවන යාස් චන්ඩ මාරුතයෙන් ඔඩීෂා ප්‍රාන්තයේ දිස්ත්‍රික්ක 3 කට දරුණු බලපෑමක් ඇතිවිය හැකි බවට ඉන්දීය කාලගුණ විද්‍යා අංශ අනතුරු ඇගවීමක් කළා.
මේ වනවිට ගැඹුරු පීඩන අවපාතයක් ලෙස වර්ධනය වී ඇති එය චන්ඩ මාරුතයක් ලෙස ලබන 26 වනදා ඔඩීෂා සහ බටහිර බෙංගාල වෙරළට ළගා වනු ඇතැයි අපේක්ෂිතයි.
ඉන්දීය කාලගුණ විද්‍යා දෙපාර්තමේන්තුව නියෝජ්‍ය අධ්‍යක්ෂ උමාෂංකර් දාස් සඳහන් කළේ ඔඩීෂාවේ උතුරු දිගින් පිහිටි මයුර්බනාජ්, භාද්‍රක් සහ බලසෝර් දිස්ත්‍රික්ක වලට එම බලපෑම වැඩි වශයෙන් සිදුවිය හැකි බවයි.
දැනටමත් එම ප්‍රදේශවලට ඇදහැලෙන වැසි අනිද්දා වනවිට එය තවදුරටත් උත්සන්න වනු ඇතැයි ඔහු වැඩිදුරටත් සඳහන් කළා. යාස් චන්ඩ මාරුතයට මුහුණදීම සඳහා ඉන්දීය ආරක්ෂක අංශ සහ වෙරළාරක්ෂක බලකාය සීරුවෙන් තබා ඇති බවයි ඉන්දීය මාධ්‍ය සඳහන් කළේ.
