ආනයනික භාණ්ඩ මත පනවා ඇති සෙස් බදු ඉවත් කර නව තීරුබදු ක්‍රමයක් හඳුන්වාදීමට තීරණය කර ඇති බව මුදල් හා ක්‍රමසම්පාදන නියෝජ්‍ය අමාත්‍ය අනිල් ජයන්ත පවසනවා.
දේශීය කර්මාන්තකරුවන් ආරක්ෂා කිරීමේ අරමුණින් මෙම තීරණයට එළඹි බවයි නියෝජ්‍ය අමාත්‍යවරයා අද (11) පාර්ලිමේන්තුවේ දී අදහස් දක්වමින් සඳහන් කළා.
ඒ, අනුව අදියර වශයෙන් මෙම සෙස් බදු ඉවත් කිරීමට බලාපොරොත්තු වන බවයි වැඩිදුරටත් අදහස් දක්වමින් ඔහු පැවසුවේ.
දේශීය කර්මාන්තකරුවන් ආරක්ෂා කිරීමේ අරමුණින් ආනයනික භාණ්ඩ මත සෙස් බදු පැනවුවත් දේශීය කර්මාන්ත බොහොමයක් ආනයනික අමුද්‍රව්‍ය මත රඳා පවතින බැවින් එම නිෂ්පාදනයන්ගේ ද පිරිවැය ඒ හා සමානව ඉහළ මට්ටමක පවතින බැවින් අදියර වශයෙන් සෙස් බදු ඉවත් කිරීමට කටයුතු කරන බවයි ඔහු පැවසුවේ.
පළමුව අතරමැදි ද්‍රව්‍ය සඳහා සහන කාලයක් සහිතව සෙස් බදු ක්‍රමයෙන් ඉවත් කිරීම තුළින් දේශීය කර්මාන්තවලට හානියක් නොවන පරිදි මෙන්ම ක්‍රමිකව එම නිෂ්පාදන ක්‍රියාවලිය සඳහා නිෂ්පාදකයින් අනුගත කිරීමේ හැකියාව සහ ඔවුන්ට අත්‍යවශ්‍ය අමුද්‍රව්‍ය වියදම් අවම කර ගැනීම තුළින් නිෂ්පාදන පිරිවැය අවමකරවීමේ ප්‍රවේශයක් මෙමගින් අපේක්ෂා කරන බවයි නියෝජ්‍ය අමාත්‍ය අනිල් ජයන්ත වැඩිදුරටත් පවසා සිටියේ.
