ජාතික ජන බලවේගයේ නායක පාර්ලිමේන්තු මන්ත්‍රී අනුර කුමාර දිසානායක ශ්‍රී ලංකාවේ පලස්තීන තානාපති ආචාර්ය සුහයිර් එම්. එච්. සෙයිඩ් මහතා හමුවී සාකච්ඡා කර තිබෙනවා.
අද පලස්තීන තානාපති කාර්යාලයේදීයි මෙම හමුව සිදුවී ඇත්තේ.
මෙම අවස්ථාව සඳහා ජාතික ජන බලවේගයේ ජාතික විධායක සභික පාර්ලිමේන්තු මන්ත්‍රී විජිත හේරත් මහතා ද සහභාගී වී තිබෙනවා.
මෙහිදී පලස්තීනයේ ඇති වී තිබෙන යුදමය තත්වය හේතුවෙන් කාන්තාවන් දරුවන් ඇතුළු විශාල පිරිසක් ජීවිතක්ෂයට පත්ව තවත් විශාල පිරිසකට ජලය, විදුලිය, ආහාර, සෞඛ්‍ය පහසුකම් නොමැතිව පීඩාවට පත්ව සිටීම පිළිබඳව ජාතික ජන බලවේගයේ කනගාටුව පලස්තීන තානාපතිවරයා වෙත පළ කළ බවයි අනුර දිසානායක මහතා කියාසිටියේ.
එක්සත් ජාතීන්ගේ සංවිධානය යුදමය ගැටලුවට ඉතා ඉක්මනින් සාධාරණ මැදිහත් වීමක් කළ යුතු අතර එම සංවිධානයේ ස්ථාවරය වන ඊශ්‍රායලය හා පලස්තීනය රටවල් දෙකක් ලෙස පිළිගැනීම වහා ක්‍රියාත්මක විය යුතු බව ද ජාතික ජන බලවේගයේ නියෝජිතයන් අවධාරණය කර තිබෙනවා.
එසේම නිදහස් පලස්තීනයක් වෙනුවෙන් දීර්ඝ කාලයක් තම පක්ෂය හඬ නඟා ඇති බව පෙන්වා දුන් අතර පලස්තීනයේ ජනතාවට නිදහසේ ජීවත් වීම සඳහා අවස්ථාව හිමි විය යුතු බව ජාතික ජන බලවේගයේ ස්ථාවරය බවයි තානාපතිවරයාට ප්‍රකාශ කර ඇත්තේ.
