ශ්‍රී ලංකාවට, ජාත්‍යන්තර මූල්‍ය අරමුදලෙන් අමෙරිකානු ඩොලර් බිලියන 2.9 ක ණය සහනය ලබාගැනීම සඳහා අවශ්‍ය මූල්‍ය සහතික සැපයීමට පැරිස් සමාජය සූදානම් බව නම් නොකළ මූලාශ්‍ර උපුටා දක්වමින් රොයිටර්ස් පුවත් සේවය වාර්තා කරනවා.
පැරිස් සමාජය විසින් ඉක්මනින් ඒ බව දැනුම් දෙනු ඇති බවයි අදාළ මූලාශ්‍ර උපුටා දක්වමින් රොයිටර්ස් පුවත් සේවය වාර්තා කර ඇත්තේ.
මෙරට ණය ප්‍රතිව්‍යුහගතකරණ ක්‍රියාවලිය සම්බන්ධයෙන් ඉන්දියාව මෙන්ම චීනයද මේවනවිට ශ්‍රී ලංකාවට සහය පළ කර තිබෙනවා. ශ්‍රී ලංකාවට අයි එම් එෆ් ණය සහනය ලබා ගැනීමේදී මෙරට ප්‍රධාන විදේශීය ණය හිමියන්ගෙන් ණය ප්‍රතිව්‍යුවහගතකරණ ක්‍රියාවලිය සම්බන්ධයෙන් සිය ස්ථාවරය විමසීම සිදුකරනවා.
ජාත්‍යන්තර මූල්‍ය අරමුදලේ ණය සහන ලබාගැනීම සඳහා එය අත්‍යවශ්‍ය සාධකයක්. ඒ අනුවයි ඉන්දියාව සහ චීනය ලංකාවට සහය ලබා දෙන බව ප්‍රකාශයට පත් කර ඇත්තේ.
ඉන්දියාව සිය ස්ථාවරය ප්‍රකාශයට පත් කිරීමෙන් අනතුරුව එරට විදේශ කටයුතු අමාත්‍ය ආචාර්ය එස් ජයශංකර් සංචාරයක් සඳහා මෙරටට පැමිණි අතර ඔහු පැවසුවේ මෙරට ණය ප්‍රතිව්‍යුහගතකරණය සඳහා ඉන්දියාව පූර්ණ සහය ලබාදෙන බවයි.
ඉන්දියාව කල් නොමරා ශ්‍රී ලංකාවේ ණය ප්‍රතිව්‍යුහගතකරණ සහතිකය ජාත්‍යන්තර මූල්‍ය අරමුදල වෙත ලබාදුන් බවයි ඉන්දීය විදේශ අමාත්‍යවරයා සඳහන් කළේ.
