පොඩි මිනිහගේ වාහන සිහිනය දුර යන ලකුණු – බදු සමඟ වාහන මිලේ ලොකු වෙනසක් (වීඩියෝ)

ආනයනය කරනු ලබන වාහන සඳහාවන ආනයනික බදු ප්‍රතිශතයන රජය විසින් ගැසට් නිවේදනයක් මඟින් පසුගිය දා (10) ප්‍රකාශයට පත් කළා.

එලෙස රජය විසින් ගැසට් නිවේදනය කර ඇති නව බදු ප්‍රතිශතයන් සමඟ පෙබරවාරි මාසයේ සිට ආනයනය කරනු ලබන වාහනවල මිල ගණන් වර්තමානයේ වෙළඳපොලේ පවතින වාහන මිල ගණන්වලට වඩා සුළු වැඩිවීමක් පෙන්නුම්කරන බව ශ්‍රී ලංකා වාහන ආනයනකරුවන්ගේ සංගමය පවසනවා.

එම සංගමයේ සභාපති ප්‍රසාද් මානගේ අද (12) මාධ්‍ය හමුවක් කැඳවමින් මේ බව සඳහන් කර සිටියා.

එමෙන්ම වෙළඳපොලේ පවතින භාවිත කළ වාහන (සකන්ඩ් හෑන්ඩ්) වාහනවල මිල ගණන් ද විශාල වශයෙන් පහත යෑමක් බලාපොරොත්තු විය නොහැකි බවයි සභාපතිවරයා මෙහිදී වැඩිදුරටත් සඳහන් කළේ.

මෙහිදී සභාපතිවරයා; ජනාධිපතිවරයාගෙන් ඉල්ලා සිටියේ පාරිභෝගිකයෙකුට හොඳ වාහනයක් සාධාරණ මිලකට ලබාගත හැකිවන පරිදි අවශ්‍ය වටපිටාව සකසා දෙන ලෙසයි.

මේ අතර වසරකට ඩොලර් බිලියනක පමණ ප්‍රමාණයක් වාහන ආනයනය සඳහා මුදල් වෙන්කර හැකි බවට රජය තම සංගමය සමඟ ප්‍රකාශ කර ඇති බව ද ඔහු කියා සිටියා.

ඒ, අනුව වසරකට වාහන 50,000ක් පමණ ආනයන සඳහා හැකිවනු ඇති බව ඔහු මෙම මාධ්‍ය හමුවේ දී සඳහන් කළා.