මියන්මාරයේ Myawaddy ප්‍රදේශයේ දැනට රඳවා සිටින ශ්‍රී ලාංකිකයන්ගේ ගැටලුව පිළිබඳව විදේශ කටයුතු අමාත්‍යවරයා අද (03) පස්වරුවේ මියන්මාර නියෝජ්‍ය අග්‍රාමාත්‍ය සහ විදේශ කටයුතු අමාත්‍ය U Than Swe මහතා සමග දුරකථනයෙන් සාකච්ඡා කර තිබෙනවා.
මේ සම්බන්ධයෙන් පසුගියදා බැංකොක් නුවර පැවති බිම්ස්ටෙක් සමුළුවට සමගාමීව ද අමාත්‍යවරයා මියන්මාර විදේශ කටයුතු අමාත්‍යවරයා සමඟ මීට පෙර සාකච්ඡා කර තිබුණා.
දුරකථන සංවාදය අතරතු, ශ්‍රී ලංකා විදේශ අමාත්‍යවරයා ඉල්ලා සිටියේ මෙම ශ්‍රී ලාංකිකයන් වහා නිදහස් කර ගැනීම සඳහා මියන්මාර රජයේ සහාය සහ හදිසි මැදිහත්වීම අවශ්‍ය බවයි.
එලෙස රඳවාගෙන සිටින ශ්‍රී ලාංකිකයන්ගේ ආරක්ෂාව සහ යහපැවැත්ම තහවුරු කිරීමට හැකි සෑම උත්සාහයක්ම ගන්නා ලෙස ද විදේශ අමාත්‍යවරයා මියන්මාර විදේශ අමාත්‍යවරයාගෙන් ඉල්ලා තිබෙනවා.
මියන්මාරයට නීති විරෝධිව රැගෙන ගොස් සිටින මෙම ශ්‍රී ලාංකිකයින් ආරක්ෂිතව ගෙන්වා ගැනීම සඳහා මියන්මාරයේ විදේශ කටයුතු අමාත්‍යාංශය සහ මියන්මාරයේ ශ්‍රී ලංකා තානාපති කාර්යාලය අඛණ්ඩව ක්‍රියාකාරීව මියන්මාර බලධාරීන්ගේ සහාය සහ සහයෝගීතාවය අපේක්ෂා කරනු ලබනවා.
විදේශ කටයුතු අමාත්‍යාංශයට ලැබී ඇති තොරතුරුවලට අනුව, සයිබර් අපරාධ සඳහා මිනිස් ජාවාරමට ගොදුරු වූ ශ්‍රී ලාංකිකයන් 56 දෙනෙකු මයිවාඩි ප්‍රදේශයේ නීතිවිරෝධී ලෙස රඳවාගෙන සිටින බව සඳහන්.
මියන්මාර රජය සමඟ සාකච්ඡා කර ශ්‍රී ලාංකිකයන්ගේ ආරක්ෂාව සහතික කිරීම සඳහා හැකි සෑම ක්‍රියාමාර්ගයක්ම පිළිබඳව අඛණ්ඩව සොයා බලමින් සිටින බවයි අමාත්‍යාංශය කියාසිටියේ.
