රුපියල් හතලිස් හය ලක්ෂ පනස් දහසක් වටිනා විදේශීය නිෂ්පාදිත දුම්වැටි තොගයක් නීතිවිරෝධී ලෙස මෙරටට රැගෙන විත්, ඒවා කටුනායක ගුවන් තොටුපොළ පැමිණීමේ පර්යන්තයේ කිසිවක් ප්රකාශ කිරීමට නොමැති “හරිත මාවත” (Green Channel) ඔස්සේ පිට කර ගෙන යාමට තැත් කළ ශ්රී ලාංකික ගුවන් මගියෙක් අද (14) අලුයම ගුවන් තොටුපොළ රේගු නිලධාරීන් පිරිසක් විසින් අත්අඩංගුවට ගෙන තිබෙනවා.
මොහු 42 හැවිරිදි වියේ පසුවන හලාවත, මාරවිල ප්රදේශයේ පදිංචි ව්යාපාරිකයෙක්.
මොහු අද අලුයම 12.52ට ඩුබායි සිට එමිරේට්ස් ගුවන් සේවයේ ඊ.කේ.- 648 දරන ගුවන් යානයෙන් කටුනායක ගුවන් තොටුපොළ වෙත පැමිණ තිබුණා.
ඔහු විසින් රැගෙන ආ ගමන් මලු 04 ක් තුළ විදේශීය නිෂ්පාදිත “මැන්චෙස්ටර් ” වර්ගයේ දුම්වැටි 31,000ක් අඩංගු දුම්වැටි කාටූන් 155 ක් සගවා ගෙන තිබෙනවා.
මේ පිළිබද විධිමත් රේගු පරීක්ෂණයක් පැවැත් වූ කටුනායක ගුවන් තොටුපොළ රේගු නිලධාරීන්, මොහු නීතිවිරෝධී ලෙස රැගෙන ආ දුම්වැටි සියල්ල රාජසන්තක කර , ඔහුට රුපියල් 155,000 ක දඩ මුදලක් ගෙවන ලෙසද නියෝග කර තිබෙනවා.
wpDiscuz
