ධනුෂ්ක ගුණතිලකගේ නඩුව කල් යයි

කාන්තාවකට අතවර කිරීමේ චෝදනා ලැබ ඇප මත නිදහස්ව සිටින ශ්‍රී ලංකා ක්‍රිකට් ක්‍රීඩක ධනුෂ්ක ගුණතිලකගේ නඩුව ලබන පෙබරවාරි මස 23 වැනිදා දක්වා කල් දමා තිබෙනවා.

ඕස්ට්‍රේලියාවේ සිඩ්නි ඩව්නිං සෙන්ටර් අධිකරණයේ අද(12)කැඳවූ අවස්ථාවේදී එම නඩුව මෙලස කල් දැමීමටයි මහේස්ත්‍රාත් ඩේවිඩ් ප්‍රයිස් නියෝග කළේ.

ඕස්ට්‍රේලියානු පොලිසියට සාක්ෂි සුදානම් කිරීමට කල් ලබා දීම සඳහා නඩුව ලබන පෙබරවාරි මස 23 වැනිදා දක්වා කල් තැබූ බව ඕස්ට්‍රේලියානු මාධ්‍ය වාර්තා කර තිබෙනවා.

අද (12) නඩුව කැඳවූ අවස්ථාවේදී ධනුක්ෂක ගුණතිලක අධිකරණයේ පෙනී නොසිටි බව ද එම මාධ්‍ය වාර්තාවල සඳහන්.

ඇප කොන්දේසි එලෙසම ඉදිරියටත් වලංගු බවයි නඩුව කල් තබමින් මහේස්ත්‍රාත් ඩේවිඩ් ප්‍රයිස් ප්‍රකාශ කර ඇත්තේ.

සිඩ්නි හි නැගෙනහිර රෝස් බේ හි පදිංචි 29 හැවිරිදි තරුණියක් ගොනුකළ ලිංගික අතවර කිරීම සම්බන්ධයෙන් වූ පැමිණිල්ලකට අදාළව ධනුෂ්ක ගුණතිලකව නොවැම්බ්ර් මස 6 වෙනිදා ශ්‍රී ලංකා ක්‍රිකට් කණ්ඩායම රැඳී සිටි හෝටලයේදී සිඩ්නි පොලිසියේ අත්අඩංගුවට ගනු ලැබුවා.

දින 11ක් පාර්ක්ලීහී පිහිටි රැඳවුම් මධ්‍යස්ථානයක රඳවා තැබීමේන් පසු ඔස්ට්‍රේලියානු ඩොලර් ලක්ෂ 02ක මුදල් ඇපයක් මත ධනුෂ්ක ගුණතිලක මුදාහරිනු ලැබු‍වේ පසුගිය වසරේ නොවැම්බර් 17 වනදායි.

නමුත් ධනුෂ්ක ගුණතිලකට දැඩි ඇප කොන්දේසි රැසක් එහිදි පැනවු අතර රාත්‍රී 9 සිට උදෑසන 6 දක්වා ගමන් බිමන් ද ඔහුට තහනම් කරනු ලැබුවා.

ඊට අමතරව පැමිණිලිකාරිය ඇමතීමට හෝ සම්බන්ධ කරගැනීමට කටයුතු කිරීමෙන් වැළකීම සහ ටින්ඩර් ඇතුළු යෙදුම් භාවිත කිරීමෙන් වැළකීම ද ඇප කොන්දේසිවලට අයත්.

අද අධිකරණයේ නඩුව කැඳවු අවස්ථාවේදී සඳහන් කළේ, එම දැඩි නීති ඉදිරියටත් වලංගු බවයි. ඒ අනුව ධනුෂ්ක ගුණතිලකගේ නඩුව යළිත් පෙබරවාරි 23 වනදා කැඳවීමට නියමිතයි.