වීරඟුල පොලිසිය භාරයේ රඳවාගෙන සිටින පාතාල කල්ලි නායකයෙකු බව කියන ගනේමුල්ල සංජීව නැමැත්තා ගේ ජීවිත ආරක්ෂාව තහවුරු කිරීමේ නියෝගයක් නිකුත් කරන ලෙස ඉල්ලා ගොනුකර තිබෙන පෙත්සමක් සලකා බැලීම සඳහා ජනවාරි මස 24 වන දා කැඳවන ලෙස අභියාචනාධිකරණය නියෝග කර තිබෙනවා.
ගනේමුල්ල සංජීව නමැත්තාගේ මව විසින් ඉදිරිපත් කර තිබෙන අදාළ පෙත්සම අද අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න චමත් මොරායස් යන මහත්වරුන්ගෙන් සමන්විත විනිසුරු මඩුල්ල ඉදිරියේයි කැඳවනු ලැබුවේ.
එහිදී විනිසුරු මඩුල්ල නියෝග කළේ අදාළ පෙත්සම සලකා බැලීම සඳහා ලබන ජනවාරි මස 24 වනදා කැඳවන ලෙසයි.
ගනේමුල්ල සංජීව නමැත්තා ගේ මව වන එලන්නෝනා මැන්ඩිස් නැමැත්තිය විසින් මෙම පෙත්සම ඉදිරිපත් කර තිබුණා.
එහි වගඋත්තරකරුවන් ලෙස ගම්පහ ජ්‍යෙෂ්ඨ පොලිස් අධිකාරීවරයා, පොලිස් විශේෂ කාර්ය බලකායේ අණදෙන නිලධාරිවරයා, අපරාධ පරීක්ෂණ දෙපාර්තමේන්තුවේ අධ්‍යක්ෂවරයා, ත්‍රස්තවාදී විමර්ශන කාර්යාංශයේ අධ්‍යක්ෂවරයා, බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් ඇතුළු පිරිසක් නම් කර තිබෙනවා.
පෙත්සම්කාරිය කියා සිටින්නේ තම පුත්‍රයා මේ වන විට වීරඟුල පොලිසිය භාරයේ රඳවාගෙන සිටින බවයි.
විමර්ශන කටයුතු සඳහා තම පුත්‍රයා වගඋත්තරකාර පොලිස් නිලධාරීන් යටතට පත් කිරීම තුළින් ඔහුගේ ජීවිතයට අනතුරක් සිදුවිය හැකි බව පෙත්සම්කාරිය පෙන්වා දෙනවා.
ඒ අනුව වගඋත්තරකාර පොලිස් නිලධාරීන් යටතේ ක්‍රියාත්මක වන පොලිස් ඒකක වෙත තම පුත්‍රයා මාරු කිරීම වැළැක්වීමේ නියෝගයක් නිකුත් කරන ලෙසටයි පෙත්සම්කාරිය අධිකරණයෙන් ඉල්ලා ඇත්තේ.
