කොවිඩ්-19 වෛරසය යලිත් පැතිර යාමේ අවධානම හේතුවෙන් සෞඛ්‍ය අංශ විසින් මුඛ ආවරණ පලදින ලෙස ලබාදි ඇති උපදෙස් වලට පටහැනිව හැටන් නගරයේ ඇතැම් ව්‍යාපාරිකයන් සහ පාරිභෝගිකයන් මුඛ ආවරණ නොපැලද සහ පැලද ඇති මුඛ ආවරණය නිසි ලෙස නොපැලද නගරයේ ගමන් කරන අයුරු අප කැමරාවේ මෙසේ සටහන් විය.
හැටන් දික්ඔය නගර සභාවේ සෞඛ්‍ය අංශ විසින් සියළු දෙනාට මුඛ ආවරණ පලදින ලෙසට උපදෙස් ලබාදි තිබියදි එම උපදෙස් වලට පටහැනිව ඇතැම් ව්‍යාපාරිකයන් සහ පාරිභෝගිකයන් කටයුතු කරනු ලබයි.
මේ අතර යාපනය දිස්ත්‍රීක්කයේ ව්‍යාප්ත වෙමින් පවතින කොරෝනා වෛරසය මැඩපැවත්වීම සඳහා යුද හමුදාවෙන් ආරක්ෂිත වැඩසටහන් කිහිපයක් දියත් කිරීමට පියවර ගෙන ඇතැයි යාපනය ආරක්ෂක සේනා ආඥාපති මේජර් ජෙනරල් ප්‍රියන්ත පෙරේරා පවසා සිටියේය.
යාපනය දිස්ත්‍රීක්කයේ කොරෝනා වෛරසය ව්‍යාප්ත විය හැකි ස්ථායන් සියල්ලක්ම විෂබීජහරනය කිරීම, අපිරිසිදු ස්ථාන සෝදා හැරීම, ජනතාව දැනුවත් කිරීම, එක් ස්ථානයකට ජනතාව එක්රැස්වීමෙන් වැලක්වීම, සෞඛ්‍ය ආරක්ෂිත පියවරයන් අනුගමනය කරවිම වැනි කරුනු වෙනුවෙන් යුද හමුදාවේද සහය ලබා දීමට යාපනය ආරක්ෂක සේනා මූලස්ථානය විසින් පියවර ගෙන ඇත.
එමෙන්ම යාපනයේ ජනතාව ආරක්ෂා කිරීම සඳහා මෙන්ම යාපනය දිස්ත්‍රීක්කයේ කොරෝනා ව්‍යාප්තිය වැලක්වීම සඳහා යාපනයේ ධීවරයින්ගෙන්ද ආරක්ෂක අංශ විසින් විශේෂ ඉල්ලීමක් කොට ඇත්තේ මේ වන විට ඉන්දියාවේ පවතින දැඩි කොරෝනා අවධානම හේතුවෙන් ඉන්දීය ධීවරයින් සමග පවත්නා සම්බන්ධතා නවත්වන ලෙසටය.
