2024 වසරේ ඔක්තෝම්බර් මස නුවරඑළිය යහපත් හෙඩේරාගේ බාලිකා මහ විද්‍යාලයේ දරුවන් 13 දෙනෙකුට අමානුෂික ලෙස පහර දී දරුවන් දෙදෙනෙකු රෝහල්ගත වීමේ සිද්ධිය සම්බන්ධව අත්අඩංගුවට ගෙන ඇප මත නිදහස් කරනු ලැබූ නිලංකා ද සිල්වා කන්‍යා සොයුරිය -විදුහල්පතිනියගේ නඩුව අද (10) නුවරඑළිය මහේස්ත්‍රාත් අධිකරණය කැඳවූ අවස්ථාවේ දී පොලිස් රාජකාරියට බාධා කිරීම හා විමර්ශන කටයුතුවලට සහයෝගය ලබා නොදීම යන කරුණු මුල් කරගනිමින් තවත් නඩුවක් ගොනු කිරීමට නුවරඑළිය පොලිසිය කටයුතු කර තිබුණා.
ඒ දරුවන්ට පහර දීමේ සිදුවීම සම්බන්ධව සාක්ෂි සටහන් කර ගැනීමට පාසලට ගිය පොලිස් නිලධාරීන්ට බැණ වැදීමේ චෝදනාව සහ පොලිස් රාජකාරීවලට බාධා කිරීම යන චෝදනා මුල් කරගනිමින්.
අගතියට පත් දරුවන්ගේ පාර්ශ්වය වෙනුවෙන් දෙමාපියන්ගේ සහාය ඇතිව අධිකරණයට කරුණුු වාර්තා කළ ජ්‍යෙෂ්ඨ නීතිඥවරුන් වන සජීව කෞසල්‍ය ඩයස් මහතා සහ පුණ්‍යමිණි බාලසූරිය යන මහත්වරුන්ගේ කරුණු දැක්වීමත් සමඟ ග්‍රාම නිලධාරී පදිංචි සහතික සමග රුපියල් ලක්ෂ පහ බැගින් වූ ශරීර ඇප දෙකක් සහ දැඩි ඇප කොන්දේසි මත විදුහල්පති කන්‍යා සොයුරිය නිදහස් කිරීමට නුවරඑළිය මහේස්ත්‍රාත් ප්‍රබුද්ධිකා ලංකාංගනී මෙනෙවිය නියෝග කළා.
