ඉන්ධන සහනාධාරයක් ලබාදීම වෙනුවට සුළු මුදලකින් බස් ගාස්තු වැඩි කිරීමෙන් පාඩු විඳීමට සිදුව ඇති බව සමස්ත ලංකා පෞද්ගලික බස් හිමියන්ගේ සංගමය පවසයි.
එහි ප්‍රධාන ලේකම් අංජන ප්‍රියන්ජිත් මහතා සඳහන් කළේ, අද සිදුකළ ගාස්තු සංශෝධනයෙන් පසුව දින තුනක් බස් රථ ධාවනය කර ඉදිරි දිනවල බස් රථ ධාවනය සම්බන්ධයෙන් තීරණයක් ගන්නා බවය.
වැඩිදුරටත් අදහස් දැක්වු ඒ මහතා,
“ඊයේ මධ්‍යම රාත්‍රියේ සිට බස් ගාස්තු සංශෝධනයක් ලබාදී තියෙනවා. මේ බස් ගාස්තු සංශෝධනයෙන් අපි දෛනිකව ඩීසල්වලට වැය කරන මුදලවත් ලැබෙන්නේ නෑ. මෙහෙම බස් දුවන්න බෑ ඇමතිතුමනි.
මේ බස් ගාස්තු සංශෝධනය තුළින් සමස්ත බස් කර්මාන්තකරුවාගේ ඇද වැටීම නවත්වන්න බෑ. සේවක දෙපළට වැටුපක් වැඩිකරන්න බෑ. ඒ වගේම බස් ටික දුවන්නත් අද සිපෙට්කෝ පිරවුම්හල්වල ඩීසල් නෑ. ඒක නිසයි අද බස් ගාල්වෙලා තියෙන්නේ. බස් ගාස්තුව ලබාදුන්නේ IOC ඩීසල් මිලට නෙමෙයි අමාත්‍යවරයා සිපෙට්කෝ මිලට කියන එක අමතක කරන්න එපා.
අපි රජයට යෝජනා කළේ බස් ගාස්තු සංශෝධනයක් නෙමෙයි. රජය පටලවා ගත්තා. අපි ඉල්ලුවේ ඩීසල් සහනාධාරයක්. අපි තියෙන ගාස්තුවටම බස් රථ ධාවනය කරන්නම් අපිට ඩීසල් රු 121ට දෙන්න කියලයි අපි කිව්වේ.
නමුත් රජය අමාත්‍යවරයා තීන්දු කළේ සොච්චම් බස් ගාස්තුවක් දීලා පෞද්ගලික බස් රථ හිමියා හා සේවකයා සනසාලන්නට. ටයර් එකක් මිල ඊයේ රු 35,000කින් ඉහළ ගියා.”
