හිටපු යුද හමුදාපති මහේෂ් සේනානායක සජබය සමඟ එක්වෙයි

හිටපු යුද හමුදාපති විශ්‍රාමික ජෙනරාල් මහේෂ් සේනානායක සමගි ජන බලවේගය සමඟ එක් වී තිබෙනවා.

ඒ, අනුව ඔහු සමගි රණවිරු බලවේගයේ ප්‍රධානියා ලෙස පත්කර ඇති බවයි තොරතුරු වාර්තා වුණේ.

ජෙනරාල් මහේෂ් සේනානායක සිය මූලික අධ්‍යාපනය කොළඹ ආනන්ද විද්‍යාලයෙන් ලබාගැනීමෙන් පසුව ඇමරිකා එක්සත් ජනපදයේ හමුදා අණ හා මාණ්ඩලික විද්‍යාලයෙන් සිවිල් ඉංජිනේරු විද්‍යා උපාධියත් ජවහර්ලාල් නේරු විශ්වවිද්‍යාලයෙන් තවත් උපාධියකුත් ලබා ගෙන තිබෙනවා.

1981 ඔක්තෝබර් 16 වැනි දින මහේෂ් සේනානායක 16 වැනි ශිෂ්‍යභට නිලධාරින් බඳවා ගැනීම දිගු පාඨමාලාව හරහා ශ්‍රී ලංකා හමුදාවට බැඳුනා.

එහි පුහුණුව අවසන් කිරීමෙන් පසුව, ඔහු ඉංජිනේරු බලකායේ දෙවැනි ලු‍තිනන්වරයකු ලෙස පත් කරන ලද අතර, 1983 ජුනි 23 වන දින, 01 වැනි ඉංජිනේරු රෙජිමේන්තුව හා එක්වුණා.

1989 දී ඔහු විශේෂ ඒකක රෙජිමේන්තුවට මාරුවක් ලබාගත් අතර, එහිදී ඔහු 01 වැනි රෙජිමේන්තු විශේෂ බලකායේ බල අණදෙන නිලධාරියා ලෙස සේවය කළ අතර පසුව 03 වැනි රෙජිමේන්තු විශේෂ බලකායට අණ දුන්නා.

ශ්‍රී ලංකා යුද්ධ හමුදාවේ සිටි ජ්‍යෙෂ්ඨ නිලධාරියකු හා හමුදා ඉංජිනේරුවරයකු වූ විශ්‍රාමික ජෙනරාල් මහේෂ් සේනානායක ශ්‍රී ලංකා යුද හමුදා විශේෂ බලකා රෙජිමේන්තුවේ කර්නල්වරයෙක් ලෙස ද කටයුතු කර තිබෙනවා.

දශක තුන සිවිල් යුද්ධයේ ප්‍රධාන අදියර හතරේම ප්‍රවීණයෙකු වන ඔහු එහි උතුරු හා නැගෙනහිර පලාත් දෙකෙහිම සේවය කර ඇති අත්දැකීම් බහුල හමුදා නිලධාරියෙක්.

ජෙනරාල් මහේෂ් සේනානායක 2017 මාර්තු 22 වැනි දින යුද හමුදා මාණ්ඩලික ප්‍රධානී ලෙස පත් කරන ලද අතර, පසුව 2017 ජූලි 04 වැනි දින ජනාධිපති මෛත්‍රීපාල සිරිසේනගේ නියෝගයෙන් ලු‍තිනන් ජෙනරාල් සහ ශ්‍රී ලංකා යුද්ධ හමුදාවේ හමුදාපති ලෙස උසස් කරනු ලැබුවා.

2019 අගෝස්තු 21 වැනි දින ඔහු ජෙනරාල් නිලයට උසස් වීමෙන් පසු හමුදාවෙන් විශ්‍රාම ගියා.