හමාස් සමග සටන් විරාමයකට එළඹීම ඊශ්‍රායලය ප්‍රතික්ෂේප කරයි

ඊශ්‍රායලය විසින් හමාස් ත්‍රස්ත සංවිධානය සමග එළඹෙනවා යැයි කියූ සටන් විරාම ගිවිසුම පිළිබඳ ව පැතිරෙන වාර්තා ප්‍රතික්ෂේප කර තිබෙනවා.

CNN, ALJAZEERA සහ REUTERS යන ලෝක ප්‍රසිද්ධ මාධ්‍ය වාර්තා කර ඇත්තේ, මෙම නිවේදනය ඊශ්‍රායලයේ අගමැති කාර්‍යාලයෙන් නිකුත් කර ඇති බවයි.

ඒ අනුව ඊශ්‍රායලය සහ පලස්තීනය අතර ගාසා තීරයේ ඇවිළෙමින් තිබෙන දරුණු සටන්වලට කිසිදු අයුරකින් සටන් විරාමයක් නොතැබෙනු ඇති බවටයි ඊශ්‍රායල අගමැති කාර්‍යාලය පවසා ඇත්තේ.

පසුගිය සඳුදා දිනයේ දී ඊශ්‍රායලයේ දකුණු ගාසා තීරයට දරුණු මෙන් ම මිලේච්ඡ ත්‍රස්ත ප්‍රහාරයක් හමාස් ත්‍රස්ත සංවිධානයෙන් එල්ල කෙරුණා.

ඉන් ඊශ්‍රායලයේ සිවිල් වැසියන්ගේ ජීවිත 1500කට ආසන්න සංඛ්‍යාවක් අහිමි වූ අතර; පලස්තීනය විසින් දරුවන් සහ කාන්තාවන් ප්‍රාණ ඇපකරුවන් ලෙස තබා ගනිමින්, ප්‍රසිද්ධියේ ම ඔවුන්ව මරා දැමීමටයි පියවර ගැනුණේ.

ඊට අදාළ ඡායාරූප පවා සමාජ මාධ්‍ය වෙත හමාස් සංවිධානය විසින් සහ ඊට මිතුරු ගිණුම් හරහා සිදු ව තිබුණා.

මීට ලැබෙන ප්‍රතිචාරය දරුණු විය හැකි බවටයි ඊශ්‍රායලයේ අගමැති බෙන්ජමින් නෙතන්යාහු සඳහන් කළේ.

හමාස් ත්‍රස්ත කණ්ඩායම විනාශ කිරීම සඳහා සිය හමුදාව ළඟදීම ගාසා තීරයට ඇතුළු වන බවටයි ඊශ්‍රායල ආරක්ෂක හමුදා ප්‍රධානියා පැවසුවේ.

එක්සත් ජනපදය, ඊශ්‍රායලය සහ ඊජිප්තුව රෆා දේශ සීමාව හරහා ගාසා තීරයට මානුෂීය ආධාර ලබාදීම සඳහා සටන් විරාමයකට එකඟ වී ඇති බවයි.

කෙසේ වෙතත්, මෙය ඊශ්‍රායල අගමැති බෙන්ජමින් නෙතන්යාහුගේ කාර්යාලය ප්‍රතික්ෂේප කර තිබෙනවා.