මහජන සම්බන්ධතා අමාත්‍යවරයා ලෙස සේවය කළ සමයේ කිරිබත්ගොඩ නගරයේ පිහිටි රජයට අයත් ඉහළ වාණිජ වටිනාකමකින් යුතු ඉඩමක් කූඨ ලේඛන සකස්කර විකිණීම සම්බන්ධයෙන් ලැබී තිබූ පැමිණිල්ලක් මත හිටපු අමාත්‍ය මර්වින් සිල්වා මහතා කොළඹ අපරාධ කොට්ඨාසයේ නිලධාරීන් කණ්ඩායමක් විසින් ඊයේ (05) රාත්‍රී බත්තරමුල්ල පැලවත්ත ප්‍රදේශයේ පිහිටි ඔහුගේ නිවසේදී අත්අඩංගුවට ගනු ලැබුවා.
අත්අඩංගුවට ගත් මර්වින් සිල්වා මහතා අපරාධ පරීක්ෂණ දෙපාර්තමේන්තුව විසින් අද (06) දහවල් මහර අංක1 මහේස්ත්‍රාත් අධිකරණයට ඉදිරිපත් කිරීමෙන් පසුව මේ මස 17 වනදා දක්වා රක්ෂිත බන්ධනාගාරගත කිරීමට මහේස්ත්‍රාත් කාංචනා නිරංජලා ද සිල්වා මහත්මිය නියෝග කළා.
හිටපු අමාත්‍ය මර්වින් සිල්වා මහතා සමග තවත් සැකකරුවන් දෙදෙනෙකු වන කැලණිය ප්‍රාදේශීය සභාවේ මන්ත්‍රීවරයෙක් වන වෛද්‍ය ජයන්ත කබ්රාල් සහ නවීන් වීරකෝන් නමැති සැකකරුවන් දෙදෙනකු ද අත්අඩංගුවට ගෙන ඇති අතර සැකකරුවන් තිදෙනා මේ මස 17 වනදා දක්වා රක්ෂිත බන්ධනාගාර ගත කර තිබෙනවා.
පසුගිය 2015 වසරේ සිදුකර ඇති බවට සඳහන් වන මෙම අයථා ඉඩම් ගනුදෙනුව පිළිබඳ ව අපරාධ පරීක්ෂණ දෙපාර්තමේන්තුවට තොරතුරු ලැබීමෙන් පසු හිටපු අමාත්‍ය මර්වින් සිල්වා මහතා ප්‍රශ්න කිරීම සඳා අත්අඩංගුවට ගෙන අද සවස මහර මහේස්ත්‍රාත් අධිකරණය හමුවට ඉදිරිපත් කළා.
අපරාධ පරීක්ෂණ දෙපාර්තමේන්තුව මෙම සිද්ධිය සම්බන්ධයෙන් වැඩිදුර විමර්ශන සිදු කරනවා.
