අගුණුකොළපැලැස්ස බන්ධනාගාරය තුළ සිට සිදු කළ කප්පම් ගැනීමේ ජාවාරමකට සම්බන්ධ සැකකාරියන් තිදෙනකු ඇතුළු පස් දෙනෙකු පොලිස් අත්අඩංගුවට ගෙන තිබෙනවා.
රඳවා ගෙන ප්රශ්න කරන පාතාල කල්ලි සාමාජිකයෙකු වන නදුන් චින්තක වික්රමරත්න නොහොත් හරක් කටාගේ ප්රධානතම ගෝලයෙකු මෙලෙස බන්ධනාගාරය තුළ සිට කප්පම් ලබා ගැනීමේ ජාවාරම මෙහෙයවා ඇතැයි සඳහන්.
අත්අඩංගුවට ගත් සැකකරුවන් සමග ජංගම දුරකථන, බැංකු පාස්පොත්, ඒ.ටී.එම්. කාඩ්පත් ද පොලිසිය සොයාගෙන තිබෙනවා.
පසුගිය කාලය පුරා ගල්කිස්ස සහ රත්මලාන ප්රදේශවල ව්යාපාරිකයන්ට ජංගම දුරකථනයෙන් මරණීය තර්ජනය කර කප්පම් මුදල් ලබා ගැනීම සම්බන්ධයෙන් පොලිස් පරීක්ෂණ පැවැත්වීමේදී එම කප්පම් මුදල් ලබා ගැනීමට ආධාර අනුබල දීම සම්බන්ධයෙන් මෙම සැකකරුවන් හා සැකකාරියන් අත්අඩංගුවට ගෙන ඇතැයි සඳහන්.
නඳුන් චින්තක නොහොත් හරක් කටා නමැත්තාගේ ප්රධානතම ගෝලයකු වන වසර 4ක පමණ කාලයක සිට අඟුණුකොළපැලැස්ස බන්ධනාගාරයේ රඳවා සිටින මිදිගම කේ. ඩී. දිලුම් සංජීව නමැත්තා විසින් විවිධ පුද්ගලයින් ගෙන් ලබාගන්නා ලද සිම්පත් විශාල ප්රමාණයක් හා දුරකථන හතක් උපයෝගී කරගනිමින් පාතාල කල්ලි සාමාජිකයන් ගේ නම් පවසා ව්යාපාරිකයන් බියගන්වා මුදල් ලබා ගෙන ඇති බව අනාවරණය වී තිබෙනවා.
මෙම කප්පම් මුදල්, අත්අඩංගුවට ගත් සැකකරුවන් සහ සැකකාරියන් ගේ බැංකු ගිණුම්වලට තැන්පත් කරගෙන අනතුරුව බන්ධනාගාර ගතව සිටින පාතාල සාමාජිකයාගේ උපදෙස් මත විවිධ අපරාධකරුවන්ගේ ගිණුම්වලට බැර කර ඇති බවටයි වැඩිදුර විමර්ශනවලදී අනාවරණය වී ඇත්තේ.
අත්අඩංගුවට ගත් සැකකරුවන් සහ සැකකාරියන් ගාල්ල, තංගල්ල, සූරියවැව, බෙලිඅත්ත සහ ගාල්ල ප්රදේශවල පදිංචි වයස අවුරුදු 25 සහ 65 අතර පසුවන්නන්.
