මේ වනවිට රක්ෂිත බන්ධනාගාර ගතව පසුවන හිටපු සෞඛ්‍ය අමාත්‍ය කෙහෙළිය රඹුක්වැල්ලගේ රෝගී තත්ත්ව සම්බන්ධයෙන් නිරීක්ෂණය කිරීමට විශේෂඥ වෛද්‍ය මණ්ඩලයක් පත් කරන ලෙස, මාලිගාක්නද මහේස්ත්‍රාත්වරිය සෞඛ්‍ය සේවා අධ්‍යක්ෂ ජනරාල්වරයාට නියෝග කර තිබෙනවා.
කෙහෙළිය රඹුක්වැල්ල හිටපු සෞඛ්‍ය අමාත්‍යවරයා අධිකරණයට ඉදිරිපත් කිරීමට නොහැකි වන ආකාරයේ රෝගී තත්ත්වයට පත්වීම සම්බන්ධයෙන් වහාම පරීක්ෂණයක් පවත්වන ලෙස නියෝජ්‍ය සොලිසිටර් ජනරාල් ලක්මිණි ගිරිහාගම අධිකරණයට මෝසමක් ඉදිරිපත් කළා.
එම මෝසම පිළිගනිමින් අධිකරණය මෙම නියෝගය නිකුත්කරනු ලැබුවා.
ඒ, අනුව හිටපු සෞඛ්‍ය අමාත්‍ය කෙහෙළිය රඹුක්වැල්ලගේ සෞඛ්‍ය සම්බන්ධයෙන් පරීක්ෂණ පවත්වා ලබන 26 වනදා වනවිට වාර්තාවක් අධිකරණයට ඉදිරිපත් කිරීමට පියවර ගන්නා ලෙස ද අධිකරණය මෙහිදී නියෝග කළා.
ප්‍රමිතියෙන් තොර ‘ඉමියුනෝග්ලෝබින්’ ප්‍රතිදේහ එන්නත් ආනයනය කර රජයේ රෝහල්වලට බෙදාහැරීම මඟින් රුපියල් කෝටි ගණනක වංචාවක් කිරීම සහ රෝගී ජීවිත අනතුරේ දැමීම සම්බන්ධයෙන් චෝදනා ලබා සිටින හිටපු සෞඛ්‍ය අමාත්‍ය කෙහෙළිය රඹුක්වැල්ල මේ වනවිට පසුවන්න්නේ රක්ෂිත බන්ධනාගාර ගතවයි.
සෞඛ්‍ය අමාත්‍යවරයා පසුගිය 15 වනදා අධිකරණයට ඉදිරිපත් කළ යුතුව තිබුණත්, ඔහුව අධිකරණයට ඉදිරිපත් කළ නොහැකි අන්දමේ රෝගී තත්ත්වයකින් පසුවන බවත්, පසුගිය 15 වනදා සිට 22 වනදා දක්වා කාලය තුළ ඔහු අධිකරණයට ඉදිරිපත් කළ නොහැකි බවත් දැනුම් දෙමින් බන්ධනාගාර රෝහලේ වෛද්‍යවරයාගේ වාර්තාවක් අධිකරණයට ඉදිරිපත් කරනු ලැබුවා.
