තලවකැලේ, ලිඳුල පොලිස් වසමට අයත් බඹරකැලේ වතුයායේ වතු නිවාස පෙළක ඊයේ (25) රාත්‍රියේ හටගත් ගින්නෙන් නිවස 20ක් සම්පූර්ණයෙන්ම විනාශ වී ඇති බව වාර්තා වනවා.
ඊයේ (25) රාත්‍රී 9.00ට පමණ හටගත් මෙම ගින්න පාලනය කිරීම සඳහා ලිඳුල පොලිසියේ නිලධාරින් සහ වතු කම්කරුවන් එක්ව දැඩි පරිශ්‍රමයක් දැරුවා.
නිවාස 24 කින් සමන්විත වතු නිවාස පේළියක එක නිවසක මෙම ගින්න හටගෙන පැතිර තිබූ අතර, ගින්නෙන් විනාශ නොවී ඉතිරි වූයේ නිවාස 04ක් පමණයි.
මෙම ගින්න හේතුවෙන් පවුල් 20 කට අයත් සමාජිකයන් 70 දෙනෙකු පමණ මේ වනවිට අවතැන්ව ඇති අතර, ඔවුන් එම වතුයායේ ළමා සුරැකුම් මධ්‍යස්ථානයේ, පුස්තකාලයේ සහ ආගමික ස්ථානයක තාවකාලිකව රඳවා තිබෙනවා.
අවතැන් වූ පිරිසටඅවශ්‍ය පහසුකම් සහ පිසූ ආහාර ලබාදීමට වතු පාලන අධිකාරිය සහ නුවරඑළිය දිස්ත්‍රික් ආපදා කළමණාකරණ ඒකකය පියවර ගෙන ඇති බවයි වාර්තා වුණේ.
මෙම ගින්නෙන් කිසිඳු පුද්ගලයෙකුට හානියක් සිදුව නැහැ.
