සුළු හා මධ්‍ය පරිමාණ කර්මාන්තකරුවන්ට මුහුණපෑමට සිදුව ඇති දුෂ්කරුතා මගහරවා ගැනීම සඳහා කර්මාන්ත අමාත්‍යාංශයේ මැදිහත් වීමෙන් දැනට ක්‍රියාත්මක ණය පහසුකම් ලබා දීමේ කටයුතු කඩිනම් කරන ලෙස වැවිලි කර්මාන්ත සහ කර්මාන්ත අමාත්‍ය රමේෂ් පතිරණ පාර්ලිමේන්තුවේදී නිලධාරීන්ට උපදෙස් දී තිබෙනවා.
අමාත්‍යවරයාගේ සභාපතිත්වයෙන් කර්මාන්ත කටයුතු පිළිබඳ අමාත්‍යාංශයීය උපදේශක කාරක සභාව ඊයේ (06) පාර්ලිමේන්තුවේදී රැස්වූ අවස්ථාවේදී යි මෙලෙස උපදෙස් ලබා දීම සිදු වූයේ.
මේ අනුව ඉදිරි සතිය තුළ බැංකු සමග සාකච්ඡා කර ව්‍යාපෘති වාර්තා ලබා දී ඇති නිෂ්පාදන කර්මාන්තකරුවන්ට ඒ සඳහා කඩිනමින් පහසුකම් සලසන ලෙස ද අමාත්‍යවරයා විසින් අමාත්‍යාංශ ලේකම් තිලකා ජයසුන්දර මහත්මිය ඇතුළු නිලධාරීන්ට අවශ්‍ය උපදෙස් ලබා දී තිබෙනවා.
ආනයනය සීමා කිරීම හරහා මෙරට කර්මාන්තවල විශාල ප්‍රගමනයක් දැකිය හැකි බවයි අමාත්‍යවරයා මෙහිදී ප්‍රකාශ කළේ.
ඒ අනුව පසුගිය 2022 වසරේදී ඉතිහාසයේ වැඩිම අපනයන ආදායම වන ඩොලර් බිලියන 13.1ක මුදලක් ලබාගත හැකිවූ බව ද ඔහු පෙන්වා දුන්නා.
මෝටර් රථ සහ ත්‍රීරෝද රථ එකලස් කිරීමේ කර්මාන්තකරුවන් 22ක් මේවන විට මෙරට තුළ කටයුතු කරන බවත් හදුනාගත් ක්ෂේත්‍ර 20ක් ඔස්සේ කර්මාන්ත සංවර්ධන කටයුතු සිදු කරන බවත් අමාත්‍යවරයා සඳහන් කර තිබෙනවා.
මැණික් හා ස්වර්ණාභරණ, මැටි, කජු, වේවැල්, උණබට යනාදී විවිධ කර්මාන්ත ආශ්‍රිතව පවතින ගැටලු රැසක් මෙහිදී මන්ත්‍රීවරයන් විසින් කාරක සභාවේ අවධානයට යොමු කරනු ලැබුවා.
ඒ සම්බන්ධයෙන් කඩිනම් පියවර ගැනීමට ද මෙහිදී අමාත්‍යාංශ ලේකම්වරයා ඇතුළු නිලධාරීන්ට අමාත්‍යවරයා උපදෙස් දී තිබෙනවා.
