නිදහස් ශ්රී ලංකාවේ 76 වැනි අයවැය මුදල් අමාත්ය බැසිල් රාජපක්ෂ විසින් පාර්ලිමේන්තුවට ඉදිරිපත් කිරීම ආරම්භ කර තිබෙනවා.
පසු කොවිඩ් තත්ත්වය ජයගනිමින් වෙළෙඳපොළ ආර්ථිකය නිශ්පාදන ආර්ථිකයක් බවට පත්කර ගැනීමේ වැඩ පිළිවෙලක් පදනම් කර ගනිමිනුයි මෙවර අයවැය සකස් කර ඇත්තේ.
මෙය වත්මන් ආණ්ඩුවේ දෙවන අයවැය වන අතර අමාත්ය බැසිල් රාජපක්ෂ මහතා මෙවර අයවැය ඉදිරිපත් කිරීමත් සමග එකම පවුලේ සහෝදරයන් දෙදෙනෙක් අයවැය ඉදිරිපත් කළ’පළමු අවස්ථාව ලෙස මය මෙරට ඉතිහාසයට එක්වනවා.
අයවැය දෙවන වර කියවීමේ විවාදය හෙටින් ආරම්භ වී දින 7ක් පැවැත්වෙන අතර දෙවන වර කියැවීමේ ඡන්ද විමසීම නොවැම්බර් 22 වනදා සිදුකෙරෙනු ඇති.
2022 අයවැය සඳහා වන විසර්ජන පනත් කෙටුම්පත පසුගිය ඔක්තෝබර් 7 වැනිදා මුදල් අමාත්යවරයා පාර්ලිමේන්තුවට ඉදිරිපත් කළ අතර ඒ අනුව ලබන වසරේ රජයේ සමස්ත වියදම වන්නේ රුපියල් බිලියන 5128ක්.
අද පස්වරුවේ පාර්ලිමේන්තුවට ඉදිරිපත් කෙරෙන අයවැය යෝජනාවලිය සඳහා අද පෙරවරුවේ පැවති විශේෂ අමාත්ය මණ්ඩල රැස්වීමේදී අනුමැතිය හිමිව තිබෙනවා.
මෙවර අය වැය විවාදයේදී විශේෂතා කිහිපයක්ද දැකගත හැකි වනු ඇති.
ඒ අනුව ශ්රව්යාබාධිත ප්රජාව වෙනුවෙන් මෙවර අයවැය විවාදය සංඥා භාෂාවෙන් ද ඉදිරිපත් කිරීමට ද නියමිතයි.
පාර්ලිමේන්තුවේ වේත්රධාරී නරේන්ද්ර ප්රනාන්දු මහතා සඳහන් කළේ කොවිඩ් සීමාවන් යටතේ මෙවර අයවැය ඉදිරිපත් කරන අවස්ථාවට ආරාධනා කර ඇත්තේ තානාපතිවරුන්ට සහ මහකොමසාරිස්වරුන්ට පමණක් බවයි.
