බැසිල් රාජපක්ෂව අත්අඩංගුවට ගන්න වරෙන්තු

හිටපු මුදල් අමාත්‍ය බැසිල් රාජපක්ෂව අත්අඩංගුවට ගැනීමට අද (22) දිනයේ මාතර මහේස්ත්‍රත් අධිකරණය මඟින් වරෙන්තු නිකුත් කර තිබෙනවා.

මාතර, එළියකන්ද පාර, බ්‍රවුන්ස්හිල් ලිපිනයේ පිහිටි අක්කර එකහමාරක ඉඩමක් මිලදී ගැනීම සම්බන්ධයෙන් හිටපු අමාත්‍ය බැසිල් රාජපක්ෂට එරෙහිව පොලිස් මූල්‍ය අපරාධ කොට්ඨාසය විසින් මාතර මහේස්ත්‍රාත් අධිකරණයේ පවරා ඇති නඩුවකට අද (22) දිනයේ පෙනී නොසිටීම හේතුවෙන් මෙලෙස වරෙන්තු නිකුත් කරනු ලැබුවා.

මෙහිදී බැසිල් රාජපක්ෂ වෙනුවෙන් පෙනී සිටි නීතීඥයින්, ඔහු අසනීප තත්ත්වයෙන් විදෙස්ගතව ප්‍රතිකාර ලබන බැවින් අද දිනයේදී අධිකරණය හමුවේ පෙනී නොසිටින බව වෛද්‍ය වාර්තා ඉදිරිපත් කරමින් දන්වා සිටියා.

දිගින් දිගටම හිටපු අමාත්‍ය බැසිල් රාජපක්ෂ අධිකරණය මඟ හරිමින් සිටින බැවින්, ඉදිරිපත් වූ කරුණු සලකා බැලූ මාතර ප්‍රධාන මහේස්තාත් චතුරංග එරංග දිසානායක මහතා බැසිල් රාජපක්ෂට එරෙහිව වරෙන්තු නිකුත් කිරීමට නියෝග කළා.

නීතිපතිවරයා වෙනුවෙන් රජයේ අධිනීතිඥ කලණ කොඩිකාර පෙනී සිටි අතර ඇය දිර්ඝ කරුණු දැක්වීමක් සිදු කළා.

හිටපු අමාත්‍ය බැසිල් රාජපක්ෂට අද දින ලංකාවට පැමිණීමට ගුවන් බලපත්‍ර වෙන කර පසුව ඒවා අවලංගු කිරීමට කටයුතු කර ඇති බව මාතර මහේස්ත්‍රාත් අධිකරණය හමුවේ ඇය අනාවරණය කර සිටියා.

අයථා ලෙස උපයා ගත් මුදල් භාවිත කරමින් මාත,ර බ්‍රවුන්සිල ප්‍රදේශයේ ඉඩමක් මිලිදී ගැනීමේ සිද්ධියක් සම්බන්ධයෙන් හිටපු අමාත්‍ය බැසිල් රාජපක්ෂ, හිටපු අමාත්‍යවරයාගේ බිරිඳගේ සහෝදරිය වන අයෝමා ගලප්පත්ති, ඇයගේ ස්වාමියා තිස්ස ගලප්පත්ති මුදිත ජයකොඩි යන අයට එරෙහිව නඩුව ගොනු කර තිබෙනවා.

එහිදී නඩුවේ තෙවන විත්තිකාර බැසිල් රාජපක්ෂ හා සිව්වන විත්තිකාර හිටපු අමාත්‍යවරයාගේ බිරිඳගේ සහෝදරිය වන අයෝමා ගලප්පත්ති විවෘත අධිකරණය හමුවේ පෙනී නොසිටි අතර, ඔවුන්ගේ ඇපකරුවන් විවෘත අධිකරණය හමුවේ පෙනී සිටියා.

නමුත් මහෙස්ත්‍රාත්වරයා ඉදිරිපත් කළ කරුණු සලකා බැලිමෙන් අනතුරුව අධිකරණය මඟ හැර සිටි සැකකරුවන් වහාම අත්අඩංගුවට ගෙන අධිකරණයට ඉදිරිපත් කරන ලෙසයි වරෙන්තු නිකුත් කරනු ලැබුවේ.