20-20 ලෝක කුසලානයේ ශ්‍රී ලංකාව අද තරග බිමට – නායකයා ප්‍රේක්ෂකයින්ගේ සහාය ඉල්ලයි

පන්දුවාර විස්සයි විස්ස ලෝක කුසලාන තරග කාලසටහනේ අද (08) දිනයේත් තරග තුනක් පැවැත්වෙනවා.

පළමු තරගය ඇෆ්ගනිස්ථානය සහ නවසීලන්තය අතර චෙන්නායි හිදී පැවැත්වෙන අතර, මෙරට වේලාවෙන් පෙරවරු 11.00ට එම තරගය ආරම්භවීමට නියමිතයි.

අද දිනයේ පැවැත්වෙන දෙවන තරගය මුම්බායි නුවර වන්කඩේ ක්‍රීඩාංගනයේ දී පැවැත් වෙන්නේ එංගලන්තය සහ නේපාලය අතරයි.

එම තරගය අද (08) පස්වරු 3.00ට ආරම්භ වනවා.

මේ අතර මෙවර විස්සයි විස්ස ලෝක කුසලානයේ සම සත්කාරකත්වය දරණ ශ්‍රී ලංකා කණ්ඩායම ද අද දිනයේ තරග බිමට පිවිසෙනවා.

ශ්‍රී ලංකා කණ්ඩායම අයර්ලන්තය සමඟ අද තරග බිමට පිවිසෙන අතර, මෙම තරගට අද පස්වරු 7.00ට කොළඹ ආර්.ප්‍රේමදාස ක්‍රීඩාංගණයේ දී පැවැත්වෙනවා.

මේ අතර ලෝක කුසලාන තරගාවලියේ දී ශ්‍රී ලංකා කණ්ඩායමට අවශ්‍ය සහාය ලබාදෙන ලෙස ශ්‍රී ලංකා විස්සයි විස්ස නායක දසුන් ශානක ප්‍රේක්ෂකයින්ගෙන් ඉල්ලා සිටිනවා.

ඊයේ (07) කොළඹ දී පැවති මාධ්‍ය හමුවක දී දසුන් මේ බව සඳහන් කළා.