පාරිභෝගිකයකුට පහර දී තුවාල සිදු කළේ යැයි කියන සිද්ධියක් සම්බන්ධයෙන් කැකිරාව නගරයේ හෝටල් කළමනාකරුවෙකු ඇතුළු තිදෙනෙකු කැකිරාව පොලිස් ස්ථානය මගින් අත් අඩංගුවට ගෙන තිබෙනවා.
දසත ප්රාදේශීය වාර්තාකරු පැවසුවේ මෙම පහරදීම ඊයේ (24) පස්වරුවේ සිදු ව ඇත්තේ කැකිරාව මහ වීදියේ පිහිටි හෝටලයක් තුළ බවයි.
හෝටලයට පැමිණි පාරිභෝගිකයකු හා එම හෝටල් කළමනාකරවරයා අතර ඇති වූ බහින් බස් වීමක් දුර දිග යාමෙන් පසු හෝටල් කළමනාකරු ඇතුළු සේවකයින් තිදෙනෙකු විසින් අදාළ පාරිභෝගිකයාට මෙලෙස පහර දී තුවාල සිදු කර ඇතැයි පොලිසිය පවසනවා.
පහරදීමෙන් තුවාල ලැබ සිටි පුද්ගලයා කැකිරාව පොලිසියේ නිලධාරීන් මැදිහත්ව ප්රතිකාර සඳහා කඩිනමින් දඹුල්ල රෝහලට ඇතුළත් කිරීමට කටයුතු කෙරුණා.
මෙලෙස පහර කෑමෙන් තුවාල ලබා ඇත්තේ කැකිරාව – තිබ්බටුවැව ප්රදේශයේ පදිංචි 33 හැවිරිදි පුද්ගලයෙක්.
පාරිභෝගිකයකුට පහර දී තුවාල සිදු කිරීමේ චෝදනාව මත එම හෝටලයේ කළමනාකරු ඇතුළු ව තවත් සේවකයින් දෙදෙනෙකු මේ වනවිට කැකිරාව පොලිස් ස්ථානය මඟින් අත්අඩංගුවට ගෙන තිබෙනවා.
මෙලෙස පොලිස් අත්අඩංගුවට ගෙන ඇති හෝටල් කළමනාකාරවරයා ඇතුළු සැකකරුවන් උකුවෙල, මාතලේ හා මඩාටුගම යන ප්රදේශවල පදිංචි වයස අවුරුදු 66, 29 හා 28 ක් වන පුද්ගලයන් බවයි හෙළි ව ඇත්තේ.
පොලිස් අත්අඩංගුවට ගෙන සිටින සැකකරුවන් අද (25) කැකිරාව මහේස්ත්රාත් අධිකරණයට ඉදිරිපත් කිරීමට නියමිතයි.
