විදේශීය රටක නිෂ්පාදිත දුම්වැටි තොගයක් නීතිවිරෝධී ලෙස මෙරටට ගෙන ඒමට උත්සාහ කළ ගුවන් මගීන් දෙදෙනකු පොලිස් මත්ද්‍රව්‍ය කාර්යාංශයේ නිලධාරීන් පිරිසක් විසින් අත්අඩංගුවට ගනු ලැබුවා.
ඔවුන් දෙදෙනා අද (03) අලුයම 05.15ට ඕමානයේ මස්කට් නුවර සිට, ඕමාන් ගුවන් සේවයේ ඕ.වී.- 437 දරන ගුවන් යානයෙන් කටුනායක ගුවන් තොටුපොළ වෙත පැමිණ ඇති බවයි පැවසෙන්නේ.
රුපියල් පනස් නව ලක්ෂ හතලිස් දහසක් පමණ වටිනා මෙම විදේශීය දුම්වැටි තොගය තුළ “ප්ලැටිනම්” වර්ගයේ දුම්වැටි 39,600ක් අඩංගු දුම්වැටි කාටූන් 198ක් තිබී සොයා ගැනුණා.
සැකකරුවන් අතරින් එක් අයෙකු ගෝනපොළ ප්‍රදේශයේ පදිංචි 24 හැවිරිදි පුද්ගලයෙකු වන අතර ඔහු ඩුබායි සමාගම සේවය කළ ලාංකිකයෙක්.
අනෙක් මගියා බණ්ඩාරගම ප්‍රදේශයේ පදිංචි 23 හැවිරිදි තරුණියක්.
ඔවුන් සියලුම නිශ්කාශන කටයුතු නිමා කර ගුවන් තොටුපොළෙන් පිට වී යමින් සිටියදී, පොලිස් මත්ද්‍රව්‍ය කාර්යාංශයේ නිලධාරීන් විසින් ඔවුන්ගේ ගමන් මළු තුළ සඟවා තිබූ දුම්වැටි තොගය සොයාගැනුණා.
මේ වනවිට මොවුන් දෙදෙනා පොලිස් ඇප මත මුදා හැරීමට පියවර ගෙන තිබූ අතර එළඹෙන 08 වැනි දින සැකකරුවන් සහ නීතිවිරෝධී ලෙස මෙරටට ගෙන ආ දුම්වැටි තොගය මීගමුව මහේස්ත්‍රාත් අධිකරණය වෙත ඉදිරිපත් කිරීමට නියමිතයි.
