මෙම යල කන්නයේ දී වී වගාවට හා අනිකුත් බෝග වගාවන්ට බලපෑ නියඟය තත්ත්වය හේතුවෙන් පසුගිය පළමු වනදා වන විට වාර්තා වී ඇති වගාහානි ප්රමාණය අක්කර 60,503.92ක් ලෙස ඉහළ ගොස් තිබෙනවා.
පීඩාවට පත් ගොවීන් ප්රමාණය 55,951ක් බවයි කෘෂිකර්ම අමාත්යංශය කියාසිටියේ.
මෙම මස පළමුවනදා වනවිට නියඟය හේතුවෙන් සිදුවන වගා හානි ප්රමාණය පිළිබඳ වාර්තාව කෘෂිකර්ම අමාත්යවරයාට ලබා දී තිබෙනවා.
එම වාර්තාව සළකා බැලීමේදී හම්බන්තොට දිස්ත්රික්කයෙන් වාර්තා වන වගා හානි ප්රමාණය ක්රමයෙන් ඉහළ යමින් පවතින බවයි පෙනී ගොස් ඇත්තේ. ඒ අනුව මේ වනවිට හම්බන්තොට දිස්ත්රික්කයේ වගා හානි ප්රමාණය අක්කර 4479.25 දක්වාත්, පීඩාවට පත් ගොවීන් ප්රමාණය 3696 දක්වාත් ඉහළ ගොස් තිබෙනවා.
කෙසේවෙතත් තවමත් වැඩිම වගා හානි ප්රමාණය කුරුණෑගල දිස්ත්රික්කයෙන් වාර්තා වන අතර එම ප්රමාණය අක්කර 26,644.40ක්. ගොවීන් ප්රමාණය 32,144ක් බවයි කෘෂිකාර්මික හා ගොවිජන රක්ෂණ මණ්ඩලය පවසන්නේ.
දෙවන ස්ථානයට උඩවලවේ කලාපය වාර්තාවන අතර එහි අක්කර 14,667.50ක් වගා හානි සිදුවී ඇති අතර පීඩාවට පත්වූ ගොවීන් ප්රමාණය 5867ක්.
මීට අමතරව රත්නපුර අක්කර 1719ක් ( ගොවීන් 2517), මාතලේ අක්කර 1496ක් (ගොවීන් 2225), පොලොන්නරුව අක්කර 1256ක් ( ගොවීන් 482ක්) වශයෙන් වාර්තා වී තිබෙනවා.
මේ අතර පසුගිය සිකුරාදා (01) මහරගම ජාතික තරුණ සේවා සභාවේ පැවැති උත්සවයක් අමතමින් කෘෂිකර්ම අමාත්ය මහින්ද අමරවීර මහතා කියා සිටියේ නියඟය හේතුවෙන් යම් වගාහානී ප්රමාණයක් සිදුවී ඇතත් රට තුළට ලබන මහ කන්නයේ අස්වැන්න නෙළා ගන්නා තෙක් සහල් ආනයනය කිරීමේ අවශ්යතාවයක් නොමැති බවයි.
පරිභෝජනයට අවශ්ය තරම් සහල් සහ වී තොග රට තුළ පවතින බව ද අමාත්යවරයා අවධාරණය කළා.
මේ අතර දැනට පවතින වර්ෂාව හේතුවෙන් අස්වනු නෙලා ගැනීමට ආසන්න අවස්ථාවේ තිබු හම්බන්තොට දිස්ත්රික්කයේ කුඹුරු රැසක් ජලයෙන් යටවී ඇති බව ද වාර්තා වනවා. ඒ සම්බන්ධයෙන් ද අවධානය යොමු කරන ලෙසටයි අමාත්යවරයා කෘෂිකාර්මික හා ගොවිජන රක්ෂණ මණ්ඩලයට උපදෙස් ලබාදී ඇත්තේ.
