අනිද්දා (19) චෙන්නායි හි දී ආරම්භ වන ඉන්දියාවට එරෙහි ටෙස්ට් තරගාවලියේ දී සිය කණ්ඩායමේ ජ්‍යේෂ්ඨ ක්‍රීඩකයින්ගෙන් වඩාත් කැපී පෙනෙන දක්ෂතාවක් තමා බලාපොරොත්තු වන බව බංග්ලාදේශ කණ්ඩායමේ ප්‍රධාන පුහුණුකරු චන්දික හතුරුසිංහ පවසනවා.
පසුගියදා පාකිස්තාන කණ්ඩායමට එරෙහිව ඓතිහාසික ටෙස්ට් තරගාවලි ජයක් ලැබූ බංග්ලාදේශ කණ්ඩායම තම වෘත්තීය පුහුණු ජීවිතයේ මෙතෙක් හමු වූ විශිෂ්ටතම කණ්ඩායම බවටයි හතුරුසිංහ මහතා පෙන්වාදෙන්නේ.
ඉන්දියාවට එරෙහිව අනිද්දා ඇරඹෙන තරග 02කින් සමන්විත ටෙස්ට් තරගාවලියේ දී ශකීබ් අල් හසන්, මෙහිඩි සහ මුෂ්ෆිකර් රහීම් තවදුරටත් ඔවුන්ගේ කැපී පෙනෙන දක්ෂතා අතරට පිවිසෙනු ඇතැයි බංග්ලාදේශ ප්‍රධාන පුහුණුකරු බලාපොරොත්තු වනවා.
සිය මව්බිමෙන් පිටත පැවැත්වෙන මෙම තරගාවලියේ ඉතිහාසය දෙස බැලීමේ දී බංග්ලාදේශය ප්‍රබල ඉන්දීය කණ්ඩායමට එරෙහිව පැවති ටෙස්ට් තරග 67න් 08ක් පමණක් ජයග්‍රහණය කර තිබුණ ද, 2021 වසරේ සිට බංග්ලාදේශ කණ්ඩායමේ තරග ජයග්‍රහණවල කැපී පෙනෙන වර්ධනයක් නිරීක්ෂණය වීම බලාපොරොත්තුසහගත බවක් ඇති කිරීමට සමත් වූවක් බව ද හෙතෙම මාධ්‍ය හමුවකට එක්වෙමින් සඳහන් කළා.
බංග්ලාදේශ ප්‍රධාන පුහුණුකරු චන්දික හතුරුසිංහ වැඩිදුරටත් පැවසුවේ මෙවැන්නක්..;
“පකිස්ථානයට එරෙහිව ලැබූ ජයග්‍රහණය නිසැකවම මෙම තරගාවලියේ දී අපට විශාල විශ්වාසයක් ලබා දෙයි..” යනුවෙන්.
බංග්ලාදේශ නායකත්වය නජිමුල් හුසේන් ෂැන්ටෝ විසින් දරනු ලබන අතර ඉන්දීය කණ්ඩායමේ නායකත්වය රෝහිත් ෂර්මා විසින් දරනු ලබනවා.
