2025 වර්ෂයේ දී ලොව වඩාත් ම ආගන්තුක සත්කාරයට ලක් වන නගරය බවට සීගිරිය පත් ව තිබෙනවා.
Booking.com විසින් මෙම ශ්‍රේණිගත කිරීම් සිදු කරනු ලැබුවා.
මෙම පිළිගැනීම පදනම් වී ඇත්තේ ගමනාන්තයේ ආගන්තුක සත්කාරය සහ චමත්කාරය ඉස්මතු කරමින් මිලියන 360කට අධික පිරිසක් සිය නැරඹුම් සහ නැරඹීම් මධ්‍යස්ථානය ලෙස සීගිරිය සොයා ඇති බවට හෙළිවීමත් සමගයි.
Booking.com වෙබ් අඩවිය මෙම අනාවරණය කර ඇත්තේ සිය 13 වැනි “Traveller Review Awards” සම්මාන ප්‍රදානයට සමගාමී ව බවට ද වාර්තා වනවා.
ශ්‍රී ලංකාවේ ‘සංස්කෘතික ත්‍රිකෝණයේ’ හදවතෙහි පිහිටා ඇති සීගිරිය, ස්වාභාවික තේජස සහ ගැඹුරු ඉතිහාසය බාධාවකින් තොරව ඒකාබද්ධ කරන නැරඹිය යුතුම ගමනාන්තය බවයි Booking.com වෙබ් අඩවිය මෙම නම් කිරීම සිදු කරමින් පවසා තිබෙනවා.
යුනෙස්කෝ ලෝක උරුමයක් වන සුප්‍රසිද්ධ සීගිරි පර්වත බලකොටුව, විශ්මයජනක දසුන් ලබාදෙන අතර, පුරාණ ශ්‍රී ලංකාවේ ගෘහ නිර්මාණ ශිල්පයේ දීප්තිය ඉස්මතු කරන බවයි එම වෙබ් අඩවිය වැඩිදුරටත් සඳහන් කරන්නේ.
විසිතුරු මෝස්තර සහිත බතික් නිර්මාණය, විසිතුරු භාජන සහ අත්කම් රෙදිපිළි ඇතුළු අත්කම් සඳහා ප්‍රසිද්ධ සීගිරිය අසල ගම්මානය මඟ නොහැරිය යුතු අත්දැකීමක් බවයි සංචාරකයින්ට දැනුම්දෙන්නේ.
මීට අමතරව ලොව සංචාරකයින් අතර ජනප්‍රිය වෙබ් අඩවියක් වන Booking.com වෙබ් අඩවිය විසින් 2025 වසරේ පෘථිවියේ වඩාත්ම පිළිගැනීමට ලක් වූ නගර 10 ද එළිදක්වා තිබෙනවා.
පෘථිවියේ වඩාත්ම පිළිගැනීමට ලක් වූ නගර 10 අතර දෙවන ස්ථානය ස්පාඤ්ඤයේ කසෝර්ලා නගරය නම්කර ඇති අතර, Booking.com වෙබ් අඩවිය මගින් තුන්වන ස්ථානයට නම්කර ඇත්තේ බ්‍රසීලයේ උරුබිසි නගරයයි.
නවසීලන්තයේ ටවුපෝ, එක්සත් ජනපදයේ ශාන්ත ඔගස්ටින්, ඉතාලියේ ඔර්වියෙටෝ, කොලොම්බියාවේ මැනිසාලෙස්, ජර්මනියේ ක්වෙඩ්ලින්බර්ග්, තායිලන්තයේ කෝ ලන්ටා සහ එක්සත් රාජධානියේ චෙස්ටර් යන නගර පිළිවෙලින් ලෝකයේ වඩාත්ම පිළිගැනීමට ලක් වූ නගර10 අතරට නම්කර තිබෙනවා.
