ශ්රී ලංකා කාන්තා ක්රිකට් කණ්ඩායමේ කඩුලු රකින්නිය වන අනුෂ්කා සංජීවනීට දඩ මුදලක් පැනවීමට අන්තර් ජාතික ක්රිකට් කවුන්සිලය තීරණය කර තිබෙනවා.
ඒ, අනුව තරග ගාස්තුවෙන් 15%ක දඩ මුදලක් පැනවීමටයි තීරණය කර ඇත්තේ.
අන්තර් ජාතික ක්රිකට් කවුන්සිල චර්යාධර්ම සංග්රහයේ 01 වන මට්ටමේ චර්යා ධර්ම කඩ කිරීමක් හේතුවෙන් ඇයට මෙම දඩ මුදල පැනවීමට තීරණය කර ඇති බව සඳහන්.
2023 පන්දුවාර 20-20 කාන්තා ලෝක කුසලාන ක්රිකට් තරගාවලියේ පසුගියදා නිමා වූ ශ්රී ලංකාව සහ බංගලාදේශය අතර තරගය අතර තුර අනුෂ්කා සංජීවනී අදාළ චර්යා ධර්මය උල්ලංඝණයකර ඇති බවයි අන්තර් ජාතික ක්රිකට් කවුන්සිල නිවේදනය කරන්නේ.
බංග්ලාදේශ ඉනිමේ සෝභනා මොස්ටාරි දැවී යාමෙන් පසු සංජීවනී පිතිකාරිනිය දෙසට ආක්රමණශීලී ලෙස දිව ගොස් සිදුකළ සැමරීමෙන් මෙලෙස චර්යා ධර්මය උල්ලංඝණය වී ඇති බවයි එම කවුන්සිලය පවසන්නේ.
මෙහිදී දඩ මුදලට අමතරව සංජීවනීගේ විනය වාර්තාවට එක් අප්රසාද ලකුණක් ද එකතු කර තිබෙනවා.
තරඟ තීරක මණ්ඩලයේ G.S. ලක්ෂ්මි ඉදිරියේ අනුෂ්කා සංජීවනී මෙම ක්රියාව පිළිබඳ වරද පිළිගැනීම නිසා ඒ පිළිබඳව වැඩිදුර විභාගයක් අවශ්ය නොවන බවටයි ජාත්යන්තර ක්රිකට් කවුන්සිලය තීරණය කර ඇත්තේ.
ජාත්යන්තර ක්රිකට් කවුන්සිලයේ චර්යාධර්ම සංග්රහයේ 2.5 වගන්තිය යටතේ පිතිකරුවෙකු දැවී යාමේදී ක්රීඩකයින් සහ ක්රීඩක සහායක පිරිස් සඳහා වෙත කිසියම් භාෂාවක්, ක්රියාවක් හෝ අභිනයක් භාවිතා කිරීම වරදක් ලෙස දැක්වෙනවා.
