2007 වසරේදී ආරම්භ වී දශක දෙකකට ආසන්න කාලයක් තිස්සේ දිග්ගැස්සුණු සාකච්ඡාවලින් පසු, ඉන්දියාව ඊයේ (27) යුරෝපා සංගමය සමග ඓතිහාසික වෙළඳ ගිවිසුමකට එළඹුණා.
ඉන්දියාව මත 50% ක තීරුබදු පැනවූ සහ යුරෝපා සංගමයේ රටවල් 08කට 100ක තීරුබදු පනවන බවට තර්ජනය කළ එක්සත් ජනපද ජනාධිපති ඩොලන්ඩ් ට්රම්ප්ගේ තීරුබදු ආතතීන්ට ගැඹුරු ප්රතිචාරයක් වූ මෙම ඉන්දු යුරෝපා නව හවුල්කාරීත්වය, නව ලෝක පිළිවෙළක ඇඟවුම් පළ කරන බවයි විචාරකයින් පවසන්නේ.
යුරෝපා රටවල් 27 කින් සැදුම්ලත් යුරෝපා සංගමය සහ ලෝකයේ වැඩිම ජනගහනයක් සහිත රටවන ඉන්දියාව අතර නිදහස් වෙළඳාමට ඉඩ සලසමින් එළඹ ඇති මෙම නව වෙළෙඳ ගිවිසුම ඉන්දියාව සහ යුරෝපා සංගමය අතර වෙළෙඳාම ඉක්මවා ගිය නව සහයෝගීතාවයක ආරම්භයක් බවයි දෙපාර්ශ්වයේම නායකයින් සඳහන් කර ඇත්තේ
වෙළෙඳ ගිවිසුම පිළිබඳ අවසන් එකඟතා තහවුරු කිරීමෙන් පසු යුරෝපා කොමිසමේ සභාපතිනි උර්සුලා වොන් ඩර් ලේයන් සිය X ගිණුමේ සටහන් කර තිබුණේ mother of all deals ලෙසයි.
මෙම ගනුදෙනුව මගින් 2032 වන විට ඉන්දියාවට යුරෝපා සංගමයෙන් අපනයනය කරන භාණ්ඩ දෙගුණ කරනු ඇති අතර 96.6% ක වටිනාකම අනුව තීරුබදු ඉවත් කිරීම හෝ අඩු කිරීම මගින් යුරෝපීය සමාගම් සඳහා තීරුබදු වලින් යුරෝ බිලියන 4 ක ඉතිරියක් සිදුවනු ඇතැයි යුරෝපා සංගමය පවසනවා.
ඊයේ එළඹි ගිවිසුමේ එකඟතා යුරෝපා පාර්ලිමේන්තුව සහ යුරෝපා කවුන්සිලය විසින් අනුමත කිරීමෙන් පසු මෙම වසර අග භාගයේ දී පමණ අත්සන් තැබීමෙන් පසු බලපැවැත්වෙනු ඇති.
