එක්දින ක්‍රිකට් ලෝක කුසලානයට සහභාගී වන රටවල් තුනක් ඔවුන්ගේ ලෝක කුසලාන තරග කාලසටහනේ වෙනසක් සඳහා අන්තර් ජාතික ක්‍රිකට් කවුන්සිලය වෙත ලිපි යොමුකර ඇති බව ඉන්දීය ක්‍රිකට් පාලක මණ්ඩලයේ ලේකම් ජේ ෂා පවසනවා.
නවදිල්ලියේ දී ඊයේ (27) පැවති රැස්වීමකින් පසු ලේකම්වරයා මේ බව සඳහන් කර තිබෙනවා.
මේ අතර ඔක්තෝම්බර් 15 වනදා පැවැත්වීමට නියමිත ඇති ඉන්දු – පාකිස්ථාන තරගය වෙනත් දිනක දී පැවැත්වීමට සැලසුම් කර ඇති අතර, එම දිනය කවදා ද යන්න පිළිබඳව තවමත් නිශ්චිත තීරණයක් ගෙන නැහැ.
අහමදාබාද් හී නරේන්ද්‍ර මෝදි ක්‍රීඩාංගනයේ දී මෙම තරගය පැවැත්වෙන අතර, තරගය පැවැත්වෙන ඔක්තෝම්බර් 15 වනදා එම ප්‍රාන්තයේ සමරනු ලබන නවරාත්‍රී උත්සවය යෙදී තිබීම ඉන්දියා – පකිස්ථාන තරගයේ දිනය වෙනස් කිරීමට හේතු වී තිබෙනවා.
එදිනට ආරක්ෂාව සැපයීම සම්බන්ධයෙන් පවතින ගැටලුකාරී තත්ත්වය පිළිබඳව ද ඉන්දීය ආරක්ෂක අංශ විසින් කළ ඉල්ලීමකට අනුවයි එම තරගය පැවැත්වෙන දිනය වෙනස් කිරීමට තීරණය කළ ඇත්තේ.
ඒ, අනුව ජාත්‍යන්තර ක්‍රිකට් කවුන්සිලයේ වාණිජ හවුල්කරුවන්, විකුණුම්කරුවන් සහ හෝටල් කාමර කලින් වෙන්කරවා ගෙන ඇති ක්‍රිකට් ලෝලීන්ගේ සැලසුම්වලට විශාල බාධාවක් නොවන පරිදි තරගය බොහෝ දුරට ඔක්තෝබර් 14 වනදා පැවැත්වීමට උත්සාහ කරමින් සිටින බවයි තොරතුරු වාර්තා වන්නේ.
මේ අතර ලෝක කුසලාන තරඟාවලිය සඳහා ඉහළ ධාරිතාවකින් යුත් ක්‍රීඩාංගණවල විද්‍යුත් ප්‍රවේශපත්‍ර මිලදී ගැනීමේ ක්‍රමවේදයක් ක්‍රියාත්මක කිරීමට ද සැලසුම්කර ඇති බව සඳහන්.
තරග පැවැත්වෙන දිනයේ ප්‍රේක්ෂකයින්ට දිගු පෝලිම්වල රැඳී සිටීමේ දුෂ්කරතාව මඟ හරවා ගැනීමට විශේෂ සැලසුමක් ද සකස්කර ඇති බව ද වාර්තා වනවා.
තරගාවලියේ නැවත සකස් කළ කාලසටහනට නිකුත් වූ වහාම ප්‍රවේශපත් අලෙවිය ආරම්භ කරන බව ඉන්දීය ක්‍රිකට් පාලක මණ්ඩලය සඳහන් කළා.
