ලිංගික අල්ලස් ලබා ගැනීමේ චෝදනා මත උප පොලිස් පරීක්ෂකවරයෙකු අල්ලස් හෝ දුෂණ චෝදනා විමර්ශන කොමිෂන් සභාවේ නිලධාරීන් විසින් අත්අඩංගුවට ගෙන තිබෙනවා.
මෙලෙස අත්අඩංගුවට ගෙන ඇත්තේ කල්මුණේ මූලස්ථාන පොලිසියට අනුයුක්තව රාජකාරී කළ උප පොලිස් පරීක්ෂකවරයෙක්.
වරිපතනම්චේනෛ ප්‍රදේශයේ පදිංචාරියක වන පැමිණිලිකාරියට එරෙහිව කල්මුණේ මහේස්ත්‍රාත් අධිකරණයේ පවරා ඇති නඩුවක් පසුගිය බදාදා විභාගයට ගැනීමට නියමිතව තිබුණා.
එහිදී පැමිණිලිකාරියට වාසිදායක වන ආකාරයෙන් වැඩිදුර වාර්තාවක් ඉදිරිපත් කිරීමටත්, සතියකට වරක් පොලිස් ස්ථානයේ අත්සන් කිරීමට ඇති නියෝගය මාසයකට වරක් වශයෙන් දීර්ඝ කිරීමටත් අවශ්‍ය කටයුතු සලසා දීම සඳහා සැකකාර උප පොලිස් පරීක්ෂකවරයා මෙලෙස ලිංගික අල්ලස් ඉල්ලා තිබෙනවා.
ඒ අනුව අල්ලස් වශයෙන් ලිංගික අල්ලස් ලබාගැනීමට තැත් කිරීමේදීයි සැකකරු කල්මුණේ ප්‍රදේශයේ හෝටලයකදී අත්අඩංගුවටගෙන ඇත්තේ.
සැකකාර උප පොලිස් පරීක්ෂකවරයා සමන්තුරේ මහේස්ත්‍රාත් අධිකරණයට ඉදිරිපත් කිරීමට නියමිතයි.
