ගනේමුල්ල සංජීව නමැති අපරාධ කල්ලි නායකයා ඝාතනයට ගිනි අවියක් ලබාදෙමින්, එම ඝාතනය සිදු කිරීමට ආධාර අනුබල දුන් ඉෂාරා සෙව්වන්දි නමැති සිය මිණිබිරිය තෙමසකින් නිවසට නොපැමිණි බව ඇයගේ මිත්තණිය විසින් ප්‍රකාශ කර තිබෙනවා.
දසත ප්‍රාදේශීය වාර්තාකරු අදාළ සැකකාරිණියගේ පදිංචිය යැයි පැවසෙන මිනුවන්ගොඩ – කටුවැල්ල, ජයමාවතේ පිහිටි නිවසට ගිය අවස්ථාවේ දී එහි ජීවත් වන සැකකාරිණියගේ මිත්තණිය අද (20) පස්වරුවේ මේ බව සඳහන් කළා.
මිණිපිරිය මීට පෙර ද අවස්ථාවක රක්ෂිත බන්ධනාගාරගත ව සිටි බවත්; ඒ මත්ද්‍රව්‍යය චෝදනාවකට බවයි මිත්තණිය පැවසුවේ.
සැකකාරිණිය සිය දියණියගේ වැඩිමහල් දුව බවත්; ඇයට තවත් කුඩා සහෝදරයෙක් ද සිටින බව ද මිත්තණිය මාධ්‍ය වෙත පවසා සිටියා.
ඊයේ (19) දිනයේදී ම මිනුවන්ගොඩ පොලිසියෙන් පැමිණ තම මිණිබිරියගේ (සැකකාරිණියගේ) මව සහ සහෝදරයාව ප්‍රකාශ ලබා ගැනීම සඳහා පොලිසියට රැගෙන ගිය බවත්, තමන් මෙම සිදුවීම ගැන ප්‍රවෘත්ති මාර්ගයෙන් පළමුවරට දැනගත් බව ද, ඔවුන් සමග කිසිදු සම්බන්ධයක් නොමැති බව ද මිත්තණිය වැඩිදුරටත් ප්‍රකාශ කළා.
