කළුතර – මතුගම ප්‍රසිද්ධ පාසලක උසස් පෙළ සිසුන් හට දෙවැනි වාර පරීක්ෂණය සඳහා ලබා දුන් අනුමාන සාමාන්‍ය පොදු පරීක්ෂණ පත්‍රයේ මුල් ප්‍රශ්න 05 ම වත්මන් රජය පිළිබඳව අසමින් යොමු කළ ප්‍රශ්න සම්බන්ධයෙන් පසුගියදා සමාජය තුළ දැඩි කතාබහක් මතු කළා.
එහිදී විපක්ෂ දේශපාලනඥයින් පැවසුවේ; මාලිමා රජය විසින් රටේ අධ්‍යාපනය ද දේශපාලනීකරණය කිරීමට උත්සාහ දරමින් සිටින බවයි.
මෙම සිදුවීම සම්බන්ධයෙන් අධ්‍යාපන අමාත්‍යාංශය විශේෂ නිවේදනයක් නිකුත් කර තිබෙනවා.
ඒ අදාළ සිදුවීම සම්බන්ධයෙන් අමාත්‍යාංශ මට්ටමින් කඩිනම් පරීක්ෂණයක් ආරම්භ කරන බවට දැනුම්දෙමින්.
පාසල් වාර විභාග ප්‍රශ්න පත්‍රයක දේශපාලනික ස්වරූපයෙන් යුත් ප්‍රශ්න ඇතුළත් ව තිබීම පිළිබඳ ව විශේෂ පරීක්ෂණයක් සිදු කිරීමට තමන් උපදෙස් දුන් බව අධ්‍යාපන අමාත්‍යාංශයේ අධ්‍යාපන, විද්‍යා හා තාක්ෂණ ලේකම් තිලකා ජයසුන්දර මහත්මිය සිය නිලධාරීන්ට උපදෙස් ලබා දී තිබෙනවා.
එමෙන්ම අදාළ ප්‍රශ්න පත්‍රය කලාපයෙන් හෝ අමාත්‍යාංශ මට්ටමින් හෝ සැකසුණු එකක් නොව පාසලෙන්ම සැකසූ එකක් බවටත් ඊට කිසිදු ආකාරයේ රාජ්‍යය මැදිහත් වීමක් අමාත්‍යාංශයෙන් හෝ අධ්‍යාපන කලාපයෙන් හෝ සිදුව නොමැති බව ද අධ්‍යාපන අමාත්‍යාංශය සිය නිවේදනය මගින් පවසනවා.
